Ruslan Zeytullayevniñ işi boyunca mahkeme onıñ imayesiniñ bütün şefaat arizalarını red etti

14.02.201713:25

Fevral 13-te Rostov-na-Donu okrug arbiy mahkemesinde «Hizb ut-Tahrir» işi boyunca yaqalanğan Ruslan Zeytullayevniñ davası boyunca toplaşuv keçirildi.

Onıñ adliyecisi Emil Kurbedinovnıñ malümatına binaen, mahkeme toplaşuvında fevral 20-ge qadar teneffüs ilân etildi. Toplaşuv devamında imayeniñ birden bir qaç tane şefaat arizası red etildi. Hususan, mahkeme bundan evelki mahkemede diger mahkemeci terkibinde qabaatlavğa qol tutqan prokurornıñ red etilmesi aqqında şefaat arizalarını qanaatlendirmedi; mahkeme tarafından tayinlengen adliyecini red etüv aqqında, Ruslannı mahkeme toplaşuvı devamında qafeste tutuv mümkün olmağanı aqqında.

«Zeytullayev añlattı ki, oñı sanki pek telükeli cinayetçini zalğa kirseteler ve o yerden çıqaralar. Onıñ ellerini o qadar arqasına burıp qoyalar ki, o qıyışıq ketmek mecbur ola. Bu, mantıqsızlıq, insaniyetsizlik ve aşalağan bir munasebettir!» – dep ayttı Emil Kurbedinov.

Onıñ sözlerine köre, mahkeme toplaşuvı devamında delillerniñ ögrenilmesi tertibi belgilendi ve prokuror bir sıra vesiqalarnı seslendirdi. Kelecek toplaşuvda qabaatlav şaatlarınıñ çağırılması planlaştırıla, olar video konferentsiyası vastasınen sorğuğa çekilecek.

Dekabr 27-de Rusiye Federatsiyası Yuqarı mahkemesi prokurornıñ şikâyetini qanaatlendirdi ve «Hizb ut-Tahrir» bölügini teşkil etkeninen qabaatlanğan Ruslan Zeytullayevniñ işini Rostov-na-Donu şeerindeki Şimaliy-Qavqaz arbiy okrug mahkemesine yolladı.

Hatırlatamız ki, prokuror «Aqyarlı dört kişi» işi boyunca mahkemeniñ Ruslan Zeytullayevge nisbeten qararına şikâyet arizasını berdi. Evel o, Zeytullayevni 17 yılğa qattı nizam koloniyasına qapatmağa talap etken edi.

Avdetniñ bildirgenine köre, Rostov-na-Donu şeerindeki arbiy mahkeme «Hizb ut-Tahrir» işi boyunca yaqalanğanlar boyunca üküm çıqardı. Böyleliknen, terroristik faaliyetni teşkil etkeninen qabaatlanğan Ruslan Zeytullayev 7 yılğa apiske qapatıldı, Ferat Sayfullayev, Rustem Vaitov, Nuri Primov 5 yılğa umumiy nizam koloniyasına tüşti.

Telegramda kanalımızğa qoşulıñız ve eñ aktual ve meraqlı malümatlardan haberdar oluñız

Фото аватара

Автор: Редакция Avdet

Редакция AVDET