Tramp Qırımnıñ Ukrainağa qaytarıluvını bekley

15.02.20179:26

Beyaz Saraynıñ matbuat kâtibi Şon Spayser ilân etti ki, Amerika Birleşken Ştatları prezidenti Donald Tramp Qırımnıñ Ukraina terkibine qaytarılmasını bekley.

«Prezident Trapm belli etti ki, o, Rusiye ükümetinden Ukrainada zorbalıq toqtatuvı ve Qırımnı qaytaruvını bekley», – dep ayttı Spayser, Trampnıñ milliy havfsızlıq boyunca mesleatçısı Maykl Flinniñ rusiyeli elçi ile bağı sebebinden işten boşatılğanına izaat berip.

«Tramp Rusiyege qattı davrana. O, Qırım meselesini muzakere etmege devam ete, qaysı birini bundan evelki memuriyet Rusiyege zapt etmege imkân bergen», – dep ayttı Spayser.

O hatırlattı ki, Tramp tarafından tayinlengen BMT-da ABŞ daimiy temsilcisi Nikki Heyli Rusiye Fedratsiyasınıñ Ukrainada areketlerini takbih etti.

Spayser qayd etti ki, Tramp aynı vaqıtta Rusiyenen yahşı munasebette olmağa niyetlene, dep bildire TASS agentligi.

Bundan evel BMT yanındaki ABŞ daimiy temsilcisi Nikki Heyli ilân etti ki, Rusiyege qarşı sanktsiyalar Qırım Ukrainağa qaytarılacağına qadar devam etmek kerek. Onıñ fikrince, Ukrainadaki vaziyet «Rusiye areketleriniñ takbih etilmesini talap ete».

Avdetniñ bildirgenine köre, Beyaz saray qayd etti ki, Birleşken Milletler Teşkilâtı (BMT) yanındaki Amerika Birleşken Ştatları daimiy temsilcisi Nikki Heyliniñ Rusiyege qarşı sanktsiyalar boyunca noqta-i nazarı ABŞ prezidenti memuriyetiniñ noqta-i nazarına doğru kele.

Telegramda kanalımızğa qoşulıñız ve eñ aktual ve meraqlı malümatlardan haberdar oluñız

Фото аватара

Автор: Редакция Avdet

Редакция AVDET