Qırımda rusiyeli sıñırcılar Noman Çelebicihan adına qırımtatar göñülliler batalyonınıñ iştirakçisi Seit-İbraim Zaytullayevni yaqaladı. Oña nisbeten qanunsız sıñırdan keçüv aqqında madde (Rusiye Federatsiyası Cinaiy kodeksiniñ 322-ci maddesi) boyunca cinaiy iş açıldı.
Federal havfsızlıq hızmeti (FSB) idaresinde bildirdiler ki, 1997 senesi doğğan Ukraina vatandaşı Seit-İbraim Zaytullayev Qırım ile sıñırnı, keçirüv noqtasından keçmeyip, Herson vilâyeti tarafından keçmege tırıştı. Sorğu neticesinde belli oldı ki, o, bir yıldan ziyade göñülliler batalyonınıñ terkibine kire edi.
Batalyon tesisçisi Lenur İslâmov «Radio Svoboda» mühbiri Anton Naumlükke Zaytullayevniñ teşkilâtqa kirgenini tasdıqladı, amma ayttı ki, o, eki ay evel işlerden «boşatıldı». Bunen beraber İslâmov qayd etti ki, Zaytullayev istidatlı çalğıcı ola, «bizim problemalarımızdan pek qasevetlene ve ana-babasını sağına edi», qıtaiy Ukrainada tehnologik institutqa kirmege niyetlene edi.
Yaqalanğan kişi Aqmescit (Simferopol) 1 sanlı SİZO-sında endi bir aftadan ziyade buluna. O, fevral 9-dan 10-ğa keçer gecesi sıñırda yaqalandı, amma bu vaqia aqqında tek bir afta keçken soñ belli oldı.
Şimdi yigitniñ işi boyunca taqiqat alıp barıla. Onıñ anasınıñ sözlerine köre, Zaytullayevniñ tayinlengen adliyecisi de bar – Taras Omelçenko.
«Men onen pek te laf etip olamadım, çünki yanında konvoy bar edi. O ne içün Qırımğa kelmege qarar alğanı aqqında laf etmedik. O ayttı ki, qorantasını pek sağınğan. Bu yerde daa onıñ körüşken qızı yaşay», – dep añlattı yaqalanğan kişiniñ anası.
Zaytullayevniñ saifesinde tuvğan şeer olaraq Canköy qayd etilgen.
Zaytullayevge nisbeten qıynav qullanılğanı aqqında malümat yoq.
«Er alda, betinde zorbalıq izlerini körmedim. Özüm eşitkenlerimden: onen yahşı laf eteler. Onı qorquzalar dep aytıp olamayım. Taqiqatçı ayttı ki, oña şartlı müddet berile bile, amma bu mesele boyunca mahkeme qarar alaca», – dep bildire «KrımSOS» Zaytullayevniñ anasınıñ sözlerini.
Telegramda kanalımızğa qoşulıñız ve eñ aktual ve meraqlı malümatlardan haberdar oluñız
