Sürgünlik qurbanlarına bağışlanğan eñ yahşı abide leyhasınıñ müellifine 100 000 ruble berilecek

20.02.201716:47

Qırımda Qarasuvbazar (Belogorsk) şeerinde qoyulacaq qırımtatar halqı sürgünligi qurbanlarına bağışlanğan abideniñ eñ yahşı leyhası boyunca yarış ilân etildi.

Konkurs yerli cemaat erbapları tarafından teşkil etile.

Plan boyunca, abide şeer bağçasında, sürgünlik qurbanlarına bağışlanğan hatıra taşı yerinde tiklenilecek. Yarışta iştirak etmek içün ressam, mimar, eykeltıraş, dizayner ve bu yönelişteki yaş mütehassıslar, bunen beraber, öz leyhasını işlep çıqarğan diger zenaatlarnıñ saipleri davet etile.

Ğalip 100 000 ruble mukâfatınen taqdirlenecek ve leyhanıñ ömürge keçirilmesinde iştirak ete bilecek. Bundan da ğayrı, «Eñ populâr qarar» namzetliginiñ ğalibine de mukâfat taqdim etilecek: elektron şekilde rey berüv vastasınen halq eñ çoq begengen iş belgilenecek.

Talaplar şundan ibaret ki, islâm sanatı şartlarına köre, yadikârlıqta insan ve ayvanlar tasvirlemeden, ifadeli ve manalı olmalı.

«Tışqı körüniş ve kompozitsiya ceetinden abide etraftaki müitke kelişmek ve regionnıñ tabiatına (dağ etegi Qırım) uyğun malzemelerden yapılmaq kerek», – dep bildirdi leyha idarecisi Talât İlyasov.

Leyha A3 formatındaki 3 saifeden ibaret olmalı:

  1. Birinci saifede müellif (ya da müellifler gruppası) aqqında qısqa malümat, bunen beraber, leyha kontseptsiyası ve bediiy ğayesiniñ tarifi, tehnikiy hususiyetler (yadikârlıq yapılacaq malzemelerniñ tahminiy fiyatı) berilecek.
  2. 2-ci ve 3-ci saifelerde yadikârlıqnıñ dört taraftan (şimal, cenüp, şarq ve ğarp) körünişi olmaq kerek, bunen beraber, o, bağçanıñ arhitekturası ve landşaftına bağlı olmalı. Eskizni er angi tehnikada yapmaq mümkün: 3D, elnen sızılğan resim, fotokollaj qarışıq tehnikası.

Yarışta iştirak etken işler em elektron, em de kâğıt şeklinde qabul etile. Elektron şekli PDF formatında 16nazarbimbom20@gmail.com e-mail adresine yollamaq kerek. Kâğıt şekli nevbetteki adres boyunca qabul etile: Lunaçarskogo soqağı, 16, Qarasuvbazar (Belogorsk) şeeri, Qırım Cumhuriyeti, 297600.

İşler fevral 1-den başlap, 2017 senesi oktâbr 1-ge qadar qabul etilecek. Bu, konkurs aqqında esas malümattır. Tafsilâtlı malümat almaq içün nevbetteki telefon nomeri vastasınen teşkilâtçılar taqımınen bağlanmaq mümkün:  +7 (978) 786 08 33.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Author: Редакция Avdet

Avdet gazetası