Marlen Mustafayev ekstremistik timsallerni qullanğanınen qabaatlana

21.02.201715:12

Fevral 21-de saat 15:00-te Aqmescitteki (Simferopol) Kiyev rayon mahkemesinde bugün evinde tintüv keçirilgen Marlen Mustafayevniñ işi boyunca mahkeme toplaşuvı keçirilecek.

Vaqia yüz bergen yerde bulunğan mühbir Anton Naumlükniñ malümatına binaen, Mustafayev «Ekstremistik teşkilâtnıñ timsallerni qullanuv» Memuriy uquq bozuvı aqqında kodeksniñ 20.3-ci maddesi 1-ci qısmı boyunca qabaatlana. İş açılmasınıñ sebebi, Rusiyede yasaq etilgen «Hizb ut-Tahrir» teşkilâtı timsalleriniñ resimi ile Vkontakte içtimaiy ağında yerleştirilgen beyanat oldı. Mustafayevniñ adliyecisi Emil Kurbedinov ola, qaysı biri yaqında 2013 senesi Facebook saifesinde Aqmescitte keçirilgen «Hizb ut-Tahrir» mitinginden videonı paylaşqanı içün yaqalanğan edi.

Mustafayevge qol tutmaq içün kelip yaqalanğan qalğan adamlar Kiyev İçki işler rayon bölüginde buluna. Olarğa nisbeten protokollar tizile.

Avdetniñ bildirgenine köre, fevral 21-de Marlen Mustafayevniñ Boğurçada (Kamenka) evinde OMON iştiragi ile tintüv keçirildi. Tintüv keçirilgen yerde yaqalanğan kişilerden arasında Mustafayevge qol tutmaq içün kelgen Osman Arifm, Remzi Bekirov, Ruslan Suleymanov, Riza İzetov, Alim Karimov, Valid Abu Farid, Seyran Murtazayev ve digerleri oldı.

Yanvar 26-da Qırım adliyecisi Emil Kurbedinov Rusiyede yasaq etilgen «Hizb ut-Tahrir» teşkilâtı tarafından teşkil etilgen mitingden 2013 senesi videonı paylaşqanı içün mahküm etilip, 10 künge apis etildi. Bundan evel Kurbedinovnıñ dairesi ve ofisinde tintüv keçirildi.

Aynı qabaatlav boyunca Seyran Saliyev mahküm etildi. O, Rusiye Federatsiyasınıñ Memuriy qanun bozuvları aqqında kodeksiniñ 20.3-ci («Milliyetçi timsallerini, ya da ekstremistik teşkilâtlarnıñ timsallerini, ya da teşviqatı ya halq ögünde kösterüvi federal qanunlarnen yasaq etilgen timsallerni teşviq etüv ya da halq ögünde kösterüv») ve 20.29-ci («Ekstremistik malümatlarnı yapuv ve tarqatuv») maddeleri boyunca qabaatlandı.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Author: Редакция Avdet

Avdet gazetası