Bizim filolog ve programmistlerimiz, qırımtatar tilini oñaytlı ve qolay şekilde ögrenmek içün imkânlar olsun dep, elinden kelgenini yapa. Kitap ve luğatlar ne qadar qıymetli olsa da, olarnıñ yanında taşınması pek te qolay degil. Amma gacetlerge çeşit türlü ilâvelerni endirmek ve bunı daima yanında tutmaq qolaydır. Demek ki, yeter ki istek olsun, imkânlar ise endi bar. Avdet gazetası qırımtatar tilini online şekilde ögrenmek içün vastalar cedvelini tizdi.
- Medeniye.org – qırımtatar tili taşıyıcıları çoqtan begengen ve birincilerden biri olğan sayttır. Bu, tek online-tercime, transliterator degil de, aynı vaqıtta qırımtatar tarihı ve medeniyeti saasında diger bilgi almaq içün meydançıqtır.
- Medeniye.org luğatınıñ esasında teşkil etilgen qırımtatarca-rusça ve rusça-qırımtatarca luğat şeklinde ilâve. Onı Google Play saytında bu bağlandı vastasınen endirmek mümkün.
- Qırımtatarca-rusça ve rusça-qırımtatarca luğat şeklinde iOS ve Android içün Canlı Luğat ilâvesi.
İşbu ilâveniñ meraqlısı şu ki, er istegen insan, yañı söz qoşıp, luğat müellifi ola bile. Bunen beraber, Canlı Luğat ilâvesinde qırımtatar yaşları içün keçirilecek merasimler aqqında haber etüv funktsiyası bar.
İlâveni Google PlayMarket ve AppStoreden endirmek mümkün.
Doğru endirmek içün bağlantılar:
https://play.google.com/store/apps/details?id=com.can..– Google PlayMarket
https://appsto.re/ru/GUm6eb.i – AppStore
http://canlilugat.com/downloads/canlilugat.apk – Google PlayMarketten endirmek imkânı olmağan kimseler içün doğru sayttan endirmek.
- İnteraktiv öz-özüni ögretüv boyunca bedava qırımtatar Lafazan Efendi ilâvesi. İlâve zemaneviy interaktiv kitap formatında yapılğan, er saifesinde mündericege köre sözler bar. İlâveni Play Markette bu bağlantı vastasınen, bundan da ğayrı, QitSoftware saytından bu yerden endirmek mümkün.
- «Qırımtatar tili» ögretici ilâvesi, içinde 700-den ziyade söz olğan multimedia luğattan ibarettir, o, mevzu boyunca bölüklerge bölüngen. Er sözni ayrı diñlemek mümkün. Bundan da ğayrı, öz bilgilerini ögretici oyunlar vastasınen teşkermek içün imkân bar.
- Balalar içün tasil-eglence qırımtatar «QirimJr» (Qırım Cuniyor) saytı. Bu yerde mektepten aldın ve mektep çağındaki balalar içün qırımtatar tilinde kompyuter oyunları bar, bular balağa meraqlı şekilde vaqıt keçirmekten ğayrı, oyun devamında ögrenmege imkân bere. Sayt adresi: http://qirimjr.org/.
- Webinar rejiminde «Qırım Tili Online» kursı. Dünyada ilk ve yekâne qırımtatar tili online kursı ana tilini uzaqtan, yaşama yerine baqmadan, ögrenmege imkân bere. Gruppağa yazılmaq qolaydır: Facebook içtimaiy ağındaki «Qırım Tili Online» saifesine mesaj yazmaq.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
