Rusiye Federatsiyası prezidenti yanındaki İnsan aqları boyunca Şura Qırımnıñ Rusiyege qoşulmasınınıñ 3 yıllığı munasebetinen yaqalanğan qırımtatarlarğa amnistiyanı ilân etmek fikrine qol tuta bile ve alâqalı leyhanı azırlay bile.
Bu aqta İnsan aqları boyunca Şuranıñ yolbaşçısı Mihail Fedotov, siyasiy ve diniy davalar boyunca yaqalanğan qırımtatarlarnıñ adliyecileriniñ muracaatına cevap berip, ilân etti.
Onıñ sözlerine köre, işbu fikirge qol tutulsa, amnistiya boyunca zorbalıqsız cinayet etken, tek Qırımda degil, amma RF-nıñ diger regionlarında da mahküm etilgen ve taqiqat astında bulunğan şahıslar afu etilecektir.
«Aynı vaqıtta prezident ayttı ki, amnistiya sıq-sıq ilân etilmez. Keçken sene amnistiya olmadı, bizde ise amnistiya bir qaç yılda bir kere ilân etile», – dep qayd etti Fedotov.
Bundan evel adliyeci Nikolay Polozov Facebook saifesinde onıñ ve zenaatdaşı, adliyeci Mark Feyginniñ tarafından imzalanğan prezident yanındaki İnsan aqları boyunca Şuranıñ yolbaşçısına yollanılğan muracaatnı paylaştı. Adliyecilerniñ fikrince, şimdi, Qırımnıñ Rusiyege qoşulğanından üç yıl keçken soñ, «Qırım sakinleriniñ kütleviy şekilde afu etilüviniñ» vaqtı keldi.
İçtimaiy ağlarda Facebook, Vkontakte,Odnoklassniki saifelerimizge, bunen beraber,Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
