Aqyarda Noman Çelebicihannıñ öldürilüvinden 99 yıl tolğanı munasebeti ile merasim keçirildi

27.02.201714:45

Keçken afta soñu Aqyarda (Sevastopol) qırımtatar yetekçisi, cemaat, siyaset ve din erbabı Noman Çelebicihannıñ öldürilüvinden 99 yıl tolğanına bağışlanğan merasim teşkil etildi.

Hususan bu yerde, Aqyar apishanesinde, birinci Qırım müftisi ve milliy gimn müellifi ayatınıñ soñki ayını yaşadı, bundan soñ 1918 senesi fevral 23-te vahşiycesine öldürildi ve deñizge atıldı.

Aqyar cemaat palatası azası Talât Suleymanovnıñ sözlerine köre, Aqyar qırımtatar cemaatçıları er sene bu matem kününi qayd ete. Bu sene merasim şeer medeniyet ve sanat merkezinde keçirildi.

«Qırımtatarlardan ğayrı, milliy-medeniy cemiyetlerniñ temsilcilerini, çeşit milletlerge ait olğan insanlarnı da davet ettik. Merasimniñ maqsadı, Noman Çelebicihan ne qadar ulu bir insan olğanını, ne qadar büyük mirasını qaldırğanını adamlarğa añlamağa yardım etmektir», – dep qayd etti Aqyar regional qırımtatar medeniyeti merkeziniñ müdiri Diana Asanova.

Adet üzre, merasim duanen başlandı. «Ebediyet» halq vokal ansambli icrasında qırımtatar halqınıñ «Ant etkenmen» milliy gimni yanğıradı. Musafirlerge Noman Çelebicihannıñ ayatında yüz bergen esas vaqialar aqqında ikâye etildi. Merasimde vataperver yırları yanğıradı, dep bildire Crimeantatars.club.

Avdetniñ bildirgenine köre, fevral 23-te Canköy rayonındaki Küçük Alqalı (Zavet-Leninskiy) köy camisinde rayon din cemiyetleriniñ teşebbüsi ile, Qırım ve Sevastopol musulmanları diniy idaresiniñ destegi ile Noman Çelebicihan hatırasına dua merasimi keçirildi.

Bunen beraber, fevral 23-te Bağçasaraydaki Han Çayır qasabası camisinde 1918 senesi fevral 23-te vahşiycesine öldürilgen belli cemaat ve siyaset erbabı, müfti, «Ant etkenmen» qırımtatar milliy gimni sözleriniñ müellifi Noman Çelebicihannıñ hatırasına dua etildi.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

севастополь3

севастополь4

 севастополь