Bağçasaray mahkemesi qırımtatar milliy areketi iştirakçisi Emine Avamilevanıñ av qaidelerini, balıq tutma ve ayvan dünyası obyektlerini diger qullanma çeşitleri qaidelerini bozğanında (Rusiye Federatsiyası Memuriy bozuvlar aqqında kodeksiniñ 8.37-ci maddesi) qabaatlı olğanını tanıdı.
Qırımtatar faali Nariman Celâlnıñ bildirgenine köre, fevral 27-de Emine Avamilevanıñ «İlmi Umerovda çay içüvde», yani Meclisniñ (Rusiye Federatsiyasında 26.04.2016 yasaq etilgen) sanki toplaşuvında iştirak etkeni içün memuriy dava boyunca şikâyet arizası baqılması toplaşuvı keçirilmek kerek edi, amma yuqarıda qayd etilgen hatadan sebep, toplaşuv diger künge keçirildi.
«Endi Bağçasaray mahkemesi hatalarını tüzetken soñ şikâyet arizası baqılacaqtır», – dep añlattı Celâl.
Avdetniñ bundan evel bildirgenine köre, mahkeme bir qaç qırımtatar faaliniñ İlmi Umerovğa ziyaretini Qırımtatar Milliy Meclisi (Rusiye Federatsiyasında ekstremistik teşkilât olaraq tanılğan) toplaşuvı olğanını sayıp, merasimde iştirak etkenlerni para cöremesinen cezaladı. Olarğa «Faaliyeti toqtatılğanı aqqında qarar alınğan cemaat ya da diniy birleşmesi faaliyetini teşkil etüv» RF Memuriy bozuvlar aqqında kodeksiniñ 20.28 maddesi 1-ci qısmı boyunca qabaatlav taqdim etildi. Anı o vaqıt Bağçasaray rayon mahkemesi faal qırımtatar teşebbüsçisi Emine Avamilevanı 750 ruble para cöremesinen cezaladı.
2016 senesi aprel 26-da Qırım Yuqarı mahkemesi Qırımtatar Milliy Meclisini ekstremistik teşkilât olaraq tanıdı ve onıñ faaliyetini Rusiye territoriyasında yasaq etti. Sentâbr 29-da Rusiye Yuqarı mahkemesi Meclisiniñ yasaq etilmesi aqqında Qırım Yuqarı mahkemesiniñ qararını tasdıqladı.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
