«Yedinaya Rossiya» firqasından Devlet Duması deputatı Vitaliy Milonov Birinci kanalnıñ baş müdiri Konstantin Ernstke «Eurovision-2017» yarışını boykot etmek muracaatında bulundı.
Parlamentariylerge muracaatında Milonov yaza ki, Kiyev «Rusiyege qarşı ve rusofob siyasetini alıp bara». Deputatnıñ sözlerine köre, yerli kütleviy haber vastalarında ve internetniñ ukrain segmentinde «tertipsizlik üküm süre», devlette ise «neonatsizm başını kötere».
«Artistlerimizniñ bu yarışta iştirak etmesi iç bir şekilde mümkün degil. Sovet vatandaşları 1943 senesi böyle aytayıq «Reyhovision» muzıka yarışında iştirak etmege barğanlarını tasavur etmek zordır! Biz, yazıq ki, bugünki aqiqatta – bizim ve ukrain devleti arasındaki eñ yahşı er şeyni yoq etmege arzu etken mutaassıplar elde etken devlette istenilmegen musafirlermiz», – dep qayd etti Milonov ve Ernstni «vatanperverlik ve vatandaş uyanıqlığını» köstermege çağırdı.
Deputat Ernstni rusiyeli artistlerni «Eurovision-2017» yarışına yollamamağa ve konkurs yayınlamasından vazgeçmege çağırdı.
Devlet Duması medeniyet komiteti reisiniñ birinci muavini İosif Kobzon zenaatdaşı Vitaliy Milonovnıñ Rusiye «Eurovision-2017» yarışında iştirak etmek kerek olmağanı aqqındaki fikrine qol tuttı.
Bir sıra rusiyeli kütleviy haber vastaları, şahsiy menbalarınıñ malümatına esaslanıp, «Eurovision-2017» yarışına Rusiyeden esas namzetler «Golos» («Ses») şounıñ final iştirakçileri Darya Antonük ve Aleksandr Panayotov, bunen beraber, Yelena Temnikova ve Nüşa olğanını ayta.
Yaqında belli olğanına köre, avropalı konkursta Ukrainanı «O.Torvald» rok gruppası «Time» yırınen temsil etecek.
Hatırlatamız ki, Kiyev, 2016 senesi Stokgolm şeerinde Jamala ğalebe qazanğan soñ, «Eurovision-2017» yarışını keçirmek aqqını aldı. Yarış finalı mayıs 13-te keçirilecektir.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
