Aqyarda doğurğan qadınnıñ qaburğası qırıldı ve evlâdına zarar ketirildi

05.03.201717:25

Aqyar (Sevastopol) sakini İrina Barinova №1 loqsahanenen mahkemeleşecek ola, çünki, onıñ fikrince, ekimler hata yapqanları sebebinden onıñ kiçik qızı saqat ola bile.

Qadın 2016 senesi dekabr 1-de bala doğurğan edi. O, doğuruvdan evel balası bayağı büyük olğanını bile edi, ultrases talili neticesine köre, balanıñ ağırlığı 4,5 kilogrammdan ziyade edi. Lâkin, ekimler buña diqqat etmedi ve qadınnı tabiiy doğuruvğa yolladı.

Qadınnıñ sözlerine köre, doğuruv vaqtında ebanay-ekimler qadından küç ile balanı çıqarmağa tırışqan edi, ve onıñ qaburğasını qırdı. Bundan da ğayrı, ekim Denisov balanı qol ve başından tarta edi. Ekimlerniñ böyle deşetli areketleriniñ neticeleri de deşetli oldı. Baquvdan soñ balanıñ «Düşen-Erb felçi» diagnozı qoyuldı. Bu hastalıq yañı doğğan balalarda doğuruv vaqtında alğan yaraları neticesinde, qolu, başı ya da ayağı tartılsa, ola.

1 sanlı Aqyar loqsahanesiniñ tibbiy hadimleri yüz bergen vaqia içün mesüliyetni boynuna almaqtan vazgeçe. Barinovanıñ şikâyetine cevap olaraq, iş taqiqatınıñ neticeleri taqdim etildi.

Vesiqada aytıla ki, «sezaryen ameliyatı yapılması içün sebepler olmadı», «doğuruvnıñ ekinci qısmında doğurğan qadınnıñ ğayrı normal areketleri neticesinde balanıñ başı erte çıqqan ve bedeni ağır doğulğandır». Amma bala küçnen çıqarılğanı aqqında bir söz bile yazılmağan. Diagnoz ve doğuruv neticesinde alınğan yaralar aqqında bir şey aytılmağan.

Bundan da ğayrı, Barinovanıñ sözlerine köre, onıñ doğuruv planındaki bazı vesiqalar çıqarılıp deñiştirildi.

İrina Barinova Aqyar prokuraturası, şeer sağlıq saqlav bölügine ve sigorta şirketine arizalarnı yolladı. Qadın ekimlerniñ hatasını tasdıqlamağa ve olarnı mesüliyetke celp etmege niyetlene, dep bildire «İnformer».

İçtimaiy ağlarda Facebook,Vkontakte,Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Фото аватара

Автор: Редакция Avdet

Редакция AVDET