Qırım mektebi müdiresi futbol matçını, bunıñ qanunsız keçirilgen miting olğanını sayıp, dağıttı

06.03.201720:15

Kefe civarındaki Qızıltaş (Krasnokamenka) köy mektebiniñ müdiresi azbar taqımları arasında mektep stadionında keçirilgen futbol matçını, bunıñ qanunsız keçirilgen miting olğanını sayıp, toqtattı.

Bunı politsiyanıñ yardımınen yaptı.

«Mart 4-te Qızıltaşta azbar taqımları arasında matç keçirile edi, bunı mektep müdiresi ve bölük politsiya hadimi toqtattı ve Kefe memuriyeti tarafından uyğunlaştırılmağan, qanunsız miting keçirgenimizni aytıp, matçnı devam etmege yasaq ettiler. Bundan evel ise, mektep çalışıp başlağanından berli, stadion territoriyasında bulunması iç bir vaqıt yasaq etilmegen edi: balalar futbol ve diger oyunlarnı oynay edi», – dep bildirdi futbol taqımlarınıñ temsilcileri.

Kefe memuriyeti yolbaşçısı Stanislav Krısin şeer tasil bölügi müdiresi Nadejda Alekseyenkoğa vaziyetni teşkerip baqmağa rica etti, lâkin o ayttı ki, mektep müdiresi havfsızlıqnı tüşünip bunı yaptı.

«Vaziyet böyle ki, evelden haber etmeyip, stadionda büyük bala gruppasını topladılar. Kimsege haber etmegen yaş adam topladı. Ve müdire, elbet, emşire ve politsiya temsilcisiniñ ne yerde olğanını köstermege rica etti, çünki bu, ösmürlerniñ kütleviy toplaşuvıdır. Bu stadionda yerli balalar oynağanda iç mesele degildir, lâkin bu vaziyette teşkil etilgen oyun aqqında ilânlar asıldı, ve kimse mektep müdiresine haber etmedi. Bunıñ içün, eñ evelâ, İçki işler nazirliginiñ temsilcisi kelsin dep, politsiyağa muracaat etti», – dep añlattı Alekseyenko, ve qayd etti ki, mektep müdiresi bu ilânlarnı oyun keçirilgen kün kördi.

Ösmürler içtimaiy ağlarda vaqianı köstergen videonı paylaştı ve tübünde yazğan izaatta qayd etti ki, köyde diger medeniy eglenceler yoq.

«Şeerçigimizde yaşlar ve büyükler içün iç kütleviy sport merasimleri keçirimey, sportnen oğraşmaq içün başqa bir yer yoq, bunıñ içün, yaşlar öz küçünen azbar taqımları arasında yarış keçirmege qarar aldı. Oyunnı devam etkenimizden soñ, mektep müdiresi futbol qapılarını bu yerden almağa emir etti. Müdireniñ yasaqlarından soñ bizge ne qala? İçmek ve narkoman olmaqmı?» – dep sual berdi mektep talebeleri ve Kefe okrugı cemaatçılığını olarğa destek köstermege rica etti.

Memuriyet yolbaşçısı taqiqat işlerini alıp barmağa avale etti. Krısinniñ fikrince, stadionlar ve sport meydançıqları eali içün açıq olmalı. O qayd etti ki, mektep müdiresiniñ areketleriniñ doğru olğanını saymay, ve hadimlerine işbu vaqia boyunca iş taqiqatını alıp barmağa avale etti, dep bildire «Krıminform».

İçtimaiy ağlarda Facebook,Vkontakte,Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Фото аватара

Автор: Редакция Avdet

Редакция AVDET