Mart 6-da saba, tahminen saat sekiz otuzda Keriçteki «Krımgazseti» («Qırım gaz ağları») müessisesinde nevbette turğan esli-başlı aqay kişi vefat etti.
Bu aqta vaqia şaatları bildirdi.
Olarnıñ sözlerine köre, aqay kişi apansızdan vefat etti: o kürsüge oturdı ve vefat etti. Lâkin bundan evel tayaqnen yürgen esli-başlı adam bayağı mesafeni cayav keçti.
«Aqay kişi şeerden avtobusnen kete edi. Aydayıcı gorgaz binası yerleşken yerde toqtamadı ve aman-aman turaqqa qadar bardı. O yerden gorgazğa qadar qartbaba tayaqnen cayav ketken edi. O, kelip yetti, nevbette sağlam-canlı tura edi, soñra kabinet yanında kürsüge oturdı ve vefat etti», – dep añlattı vaqia şaatları.
Keriç sakinleri gorgaz binasına qadar yetmek qıyın olğanına çoqtan şikâyet ete – avtobuslar bu yönelişte yürmey, bunıñ içün şahsiy naqliyesi olmağan esli-başlı adamlar cayav kelmek mecbur. Şeer sakinleri yerli akimiyetke №2 avtobus marşrutını gorgazğa qadar uzattırmağa rica etken edi, lâkin eşitilmeyip qaldı, dep bildire «KerchFM».
İçtimaiy ağlarda Facebook,Vkontakte,Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
