Mart 7-de aqşam Seyitler (Nijnegorskiy) civarında politsiya hadimi ayaqmaşnanen ketken qıznı avtomobilnen urıp, öldürdi.
Bu aqta Qırım Cumhuriyeti İçki işler nazirliginiñ matbuat hızmeti bildirdi.
«Mart 7-de aqşam Seyitler rayonında Lifan avtomobili ve ayaqmaşnanıñ iştiragi ile qaza yüz berdi. Belgilendi ki, 28 yaşındaki rayon sakini, içki işler organlarınıñ hadimi, öz avtomobilinen ketip, ayaqmaşnanen ketken 19 yaşındaki qıznı urdı. Qaza neticesinde qız elâk oldı», – dep bildirdiler müessisede.
İşbu vaqia boyunca iş teşkerüvi keçirile.
«Politsiya hadiminiñ qabaatı tasdıqlansa, o, içki işler organlarından işten boşatılacaq, onıñ müdirleri ise intizam mesüliyetine celp etilecek», – dep bildirdiler Qırım politsiyasında, dep haber ete «İskra».
Avdetniñ evel bildirgenine köre, 19 yaşındaki qırımtatar qızı Diana Basirova, şaatlarnıñ sözlerine binaen, vahşiycesine maşnanen uruldı. Onı 50 metr mesafede taşıdılar.
Cenaze bugün, mart 9-da saat 13:00-te Seyitler rayonındaki Çelebiler (Plodovoye) köyünde, Tsentralnaya soqağı, 9 adresi boyunca qılınacaq.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
