Türkiyede Qırımdan kelgen gemiler qabul etilmey. Hususan, Aqyardan (Sevastopol) kelgen türkiyeli paromlarğa Zonguldak limanında iskelege yanaşmaq içün ruhset berilmey.
Bu aqta Hürriyet gazetası bildire.
Neşirge intervyu bergen Selin Global logistika şirketiniñ müdiri Arzıgül Kaymakçı añlattı ki, böyle vaziyet, gemilerniñ Qırımdan kelgeninen bağlıdır.
«Soñki vaqıtları, gemilerimiz Aqyardan kelgende, olar Zonguldak limanında iskelege yanaşmay. Bu pek büyük problemadır, çünki bütün yükni ihrac eticilerge qaytarmaq mecburmız», – dep şikâyet etti Kaymakçı.
Parom naqliyesi operatorı – «Qırım deñiz agentligi» şirketiniñ müdiri Stanislav Gvozdilov hususan yarımadadan çıqqan gemiler qabul etilmegeni aqqında malümatnı tasdıqladı.
«Mesele şunda ki, Türkiye Qırımnıñ rusiyeli olğanını tanımay. Mantıq boyunca, böyledir. Diger regionlardan, meselâ, Novorossiyskten rusiyeli gemiler qabul etile, Qırımdan ise qabul etilmey», – dep ayttı Gvozdilov, bildire «Primeçaniya».
Avdetniñ evel bildirgenine köre, bu sene mayıs 1-den Soçi-Yalta-Aqyar-İstanbul marşrutı boyunca kruiz layneri yürip başlaycaq.
İçtimaiy ağlarda Facebook, Vkontakte,Odnoklassniki saifelerimizge, bunen beraber,Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
