Mart 11-de qırımtatarlar Bağçasaraydaki «Azizler» eski musulman mezarlığında ananeviy temizlik yaptı.
Temizlevni yerli «Mustafa Cami» musulman teşkilâtı tarafından, şeer cemaat erbaplarınen işbirlikte teşkil etildi. «Azizler» territoriyasında terek ve çalılar kesildi, çöplük alındı.
Bu musulman mezarlığında 2006 senesi bu yerniñ bazardan boşatıluvınen bağlı vaqialar yüz berdi: 37 kün devamında gece-kündüz piket tura edi, qırımtatarlar bu yerge kelgen «Qırım Rus cemiyeti» temsilcilerine qarşı küreşti.
«Bağçasaray soqaqlarında taşlar ve tuman şaşkaları, avdarılğan ve bozulğan maşnalar, çoq yaralar, mahsus bölüklerniñ biñlerce hadimleri ve BTRlar…», – dep hatırlattı o vaqialarnı qırımtatar faali, Bağçasaray rayonınıñ sabıq yolbaşçısı İlmi Umerov.
«Azizler» territoriyası boşatılğan soñ, Bağçasaray tarihiy-medeniy qoruğına müzey yapılması, araştırma ve arheologik qazmaları keçirilmesi içün teslim etildi.
İlmi Umerov qayd etti ki, bu yer alâ daa qoruq olaraq resmiyleştirilmegen, qazma ve ilmiy araştırmalar bitirilmegen. Er baar qırımtatar faalleri saqlanıp qalğan dürbe ve minbar yanında temizlik yapa.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
