Qırımda Mikroneziya bayrağınen ketken RIVER EREGLI quru yükni taşığan, içinde Ukraina vatandaşları olğan gemi saylıqtan alındı.
Bu aqta Qara deñiz Flotunıñ malümatnen teminlev bölüginiñ müdiri Vâçeslav Truhaçöv bildirdi.
Onıñ sözlerine köre, gemi bulğar Burgas limanından Novorossiysk şeerine kete edi. Onıñ erkânı 7 adamdan ibaret — olarnıñ episi Ukraina vatandaşları ola.
Qurtaruv ameliyatı mart 12-de keçirilgen edi. Qara deñiz Flotunıñ dalıcı mütehassısları gemi yerge tiygende bozulmağanını tasdıqlağan soñ, MB-174 gemini saylıqtan aldı ve Aqyarğa (Sevastopol) keçirdi, o yerde onı Rusiye Federal havfsızlıq hızmetiniñ Sıñır hızmeti Yalı quruvı temsilcilerine teslim ettiler.
Avdetniñ evel bildirgenine köre, mart 12-de saba Qırım yalısı yanında Alupka (Büyük Yalta) rayonında Mikroneziya bayrağınen ketken RIVER EREGLI kiçik quru yük gemisi (koster) saylıqqa oturdı.
