«Taygan» ve «Skazka» saibi ayvanat bağçalarınıñ müflis olğanını ilân etecek ola

13.03.20178:47

«Taygan» arslan bağçası ve Yaltalı «Skazka» ayvanat bağçasınıñ saibi Oleg Zubkov mart ayında bağçalarınıñ müflis oluv ceryanı başlanuvı aqqında ilân ete bile.

Bu aqta o Qırım turistik biznesi temsilcileri körüşüvinde bildirdi.

«Bugünki künde «Taygan» ve «Skazka» Yalta ayvanat bağçası» esabında aman-aman para qalmadı. Ükümet tarafından Ulyanovkada Afrika vebası hastalığınen bağlı karantin içün domuz fermamıznıñ qapatılması sebebinden çoq yırtıcı ayvan aşsız qaldı, olar içün etni bazar fiyatlarınen almağa daa bir qaç kün imkânımız olur, bundan soñ temelli qararlar almaq kerek olur, çünki yırtıcı ayvanlar aç qalacaq», – dep añlattı Oleg Zubkov.

İş adamı qayd ete ki, etniñ olmağanı, yekâne problema degildir.

«Bugünki künde suvnen bağlı büyük problemamız da bar, çünki suv alğanımız Taygan suv anbarı qış devamında öyle de toldurılmadı, bizge er türlü teşkerüvler vastasınen basalar, bergi hızmeti hadimleri kassada bile otura. Bu afta veterinarlar nevbetteki plandan tış teşkerüvni keçirdi ve endi bir qaç saifelik aktnı yolladı. Hadimlerimni sorğularnen bezdirdiler. Böyle şaraitte çalışmağa devam etmek ağır», – dep qoştı Zubkov.

Avdetniñ bildirgenine köre, Oleg Zubkov İstanbul civarında dünyada eñ yahşı ayvanat bağçalarından birini açmağa planlaştıra.

Hatırlatamız ki, Oleg Zubkov Türkiye vatandaşlığını almaq içün vesiqalarnı berdi.

Bunen beraber o, Ukraina Yuqarı Radası deputatı, belli qırımtatar uquq qoruyıcısı ve dissidenti Mustafa Cemilevniñ Türkiye ükümet strukturasındaki bağlarını qullanmaq ve yardımını almaq azır olğanını ilân etken edi.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Фото аватара

Автор: Редакция Avdet

Редакция AVDET