Aqmescit merkezinde naqliye areketi toqtatılacaq

14.03.201717:49

Mart 16 ve 18  künleri Qırım baari vaqialarınıñ üç yıllığına bağışlanğan merasimler keçirilecegi munasebetinen Aqmescitte naqliye areketi toqtatılacaq.

Bu aqta Qırım Cumhuriyeti Malümat nazirliginiñ matbuat hızmeti bildire.

Mart 16-da saat 08:30-dan 10:00-ğa qadar Kirov caddesi ve Gogol soqağı çatışmasından Kirov caddesi ve Nekrasov soqağı çatışmasına qadar yol qısmında, bunen beraber, Aleksandr Nevskiy ve Serov soqaqlarınıñ çatışmasından Serov ve Karl Marks soqaqlarınıñ çatışmasına qadar yol qısmında areket sıñırlanacaq.

Mart 18-de naqliye areketi Kirov caddesi ve Gogol soqağı çatışmasından Kirov caddesi ve Nekrasov soqağı çatışmasına qadar yol qısmında saat 15:30-dan 22:00-ge qadar qapalı olacaq.

Malümat nazirliginde qayd etkenlerine köre, naqliye areketi Lenina, Proletarskaya, Kavkazskaya, Karaimskaya ve Çehova soqaqlarından keçecek.

Avdetniñ evel bildirgenine köre, Qırımnıñ Rusiyege qoşulması yıllığı munasebetinen yarımada ve Aqyarda mart 20 raatlıq künü olaraq ilân etildi.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Фото аватара

Автор: Редакция Avdet

Редакция AVDET