«Eurovision-2017» yarışında Rusiyeni temsil etecek yırcı Yuliya Samoylova 2015 senesi iyün 27-de Oleg Gazmanov ve Lolita ile beraberlikte Keriçte keçirilgen «Sport ve merametlik dünyası» festivaliniñ gala-kontsertinde iştirak etken edi.
Ukraina havfsızlıq hızmetiniñ bundan haberi bar, amma bu yırcığa Kiyevge kiriş yasaq etilecekmi degen sualge müessiseniñ matbuat hızmetinde cevap berilmedi, dep bildire «Radio Svoboda».
Yırcınıñ Ukraina territoriyasına kiriş aqqı yoqtır, çünki o, Ukraina Nazirler kabinetiniñ 2015 senesi iyün 4-te qabul etilgen №367 qararını bozdı, bu qararğa binaen, ecnebiy şahıslarnıñ Qırım territoriyasına kirmek içün mahsus ruhsetnameleri olmaq kerek, dep bildire «Qırım.Aqiqat».
Mart 13-te belli oldı ki, Rusiyeni «Eurovision-2017» yarışında yırcı Yuliya Samoylova temsil etecek.
Avdetniñ evel bildirgenine köre, avropalı konkursta Ukrainanı «O.Torvald» rok gruppası «Time» yırınen temsil etecek.
Hatırlatamız ki, Kiyev, 2016 senesi Stokgolm şeerinde Jamala ğalebe qazanğan soñ, «Eurovision-2017» yarışını keçirmek aqqını aldı. Yarış finalı mayıs 13-te keçirilecektir.
Mart 13-te Avropa birligi Şurası Ukraina topraq bütünligi ve mustaqilligini bozuvnen bağlı kirsetilgen sanktsiyalarnı daa yarım yılğa uzattırdı. Bu müddet 2017 senesi sentâbr ayına qadar devam etecek.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
