Qırım sıñırında ukrain uquq qoruyıcıları cezalandı

14.03.201721:10

Mart 13-te Qırım sıñırındaki «Kalançak» nezaret-keçirüv noqtasında rusiyeli hadimler uquq qoruyıcı gruppasını, bu cümleden, Qırım sakini Olga Skripnik ve ukrain ombudsmeni ofisiniñ temsilcisini tuttı.

Rusiye Federal havfsızlıq hızmetiniñ Qırım boyunca sıñır idaresiniñ bildirgenine köre, yaqalanğan ukrain uquq qoruyıcıları «sıñır nizamını bozğanları içün» para cöremesinen cezalandı.

Müessisede qayd eteler ki, üç Ukraina vatandaşı avtomobilnen sıñırdan rusiyeli keçirüv noqtasına keçip, «rusiyeli NKN tarafına foto ve video çıqara edi».

«Rusiyeli nezaret-keçirüv noqtası yönelişinde foto ve video çıqarğan soñ, avtomobil yolcuları maşnağa qayttı ve keri ketmege tırıştı», – dep aytıla beyanatta.

«Yaqalanğan kişiler öz areketlerini añlatıp, ukrain nezaret-keçirüv noqtasınıñ işini nezaret etkenini ayttı, amma sıñırcılarnıñ elinde olğan video delilleri olarnıñ qaidelerni bozğanlarını köstere. «Uquq qoruyıcılarğa» nisbeten Rusiye Memuriy qaidelerni bozuv aqqında kodeksiniñ 18.1-ci maddesi 1-ci qısmı boyunca memuriy protokol tizildi. Bu madde boyunca eñ büyük ceza beş biñ rubleden ibarettir», – dep qayd ettiler rusiyeli müessisede.

Aynı vaqıtta Ukraina Devlet sıñır hızmetiniñ matbuat kâtibi Oleg Slobodân bildirdi ki, mart 13-te Qırım sıñırında rusiyeli uquq qoruyıcıları tarafından yaqalanğan uquq qoruyıcılar «Kalançak» NKN-nı qanun boyunca keçti.

Olga Skripnik Facebook saifesinde dostları, uquq qoruyıcı ve cemaat teşkilâtlarından zenaatdaşları, mühbirler, adliyeciler, Ukraina Yuqarı Radasınıñ insan aqları boyunca Vekâletlisi ve Vekâletliniñ kâtibiyetine, halqara teşkilâtlar temsilcileri, halq deputatları, Ukraina ükümet organları hadimlerine ve Qırımdan destek köstergenlerge teşekkür bildirdi.

İçtimaiy ağlarda Facebook, Vkontakte,Odnoklassniki saifelerimizge, bunen beraber,Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Фото аватара

Автор: Редакция Avdet

Редакция AVDET