Gaaga mahkemesinde Ukrainanıñ Rusiyege nisbeten açtırğan davası boyunca diñlevler yekünlendi

15.03.201711:50

Gaagadaki Birleşken Milletler Teşkilâtı (BMT) Halqara mahkemesinde Ukraina açtırğan dava boyunca deñlevler yekünlendi. Kiyev Rusiyeden Donetsk ve Lugansk Halq Cumhuriyetleri territoriyasında «terroristik» taqımlarğa para ayırması, bunen beraber, silânen teminlemesi toqtatmasını talap ete. Moskva bu kibi işler BMT mahkemesiniñ adliyesi saasına kirmegenini ayta, ve Donbassta göñülli halq askerlerini silânen teminlegenini red ete. Mahkeme aprel ayınıñ soñuna qadar qarar çıqaracaq ola.

Ukrainanıñ Rusiyege qarşı açtırğan davası boyunca diñlevler dört kün devam etti. Mahkeme toplaşuvları devamında eki kün Ukraina delilleriniñ, daa eki kün Rusiye delilleriniñ ögrenilmesi içün ayırıldı. Ukraina dört esas talabını bildirdi: Rusiyeden öz sıñırını effektiv şekilde kontrol etmesi, Ukraina territoriyasına silâ ketirmesi toqtatması, qanunsız silâlı taqımlarğa destek köstermemesini, bunen beraber, Qırımda er angi etnik ayırımlardan vazgeçmesini talap etti.

Rusiye tarafı 800 saifelik maruza azırladı.

Adliyecilerniñ sözlerine köre, Qırımtatar Milliy Meclisi faaliyetiniñ yasaqlanması Qırımda ekstremizmge qarşı küreşnen bağlı, Ukraina ise Rusiyeden bu yasaqnıñ lâğu etilmesini iç soramağan edi.

Rusiye prezidentiniñ matbuat kâtibi Dmitriy Peskov bildirdi ki, Rusiye Gaagadaki BMT Halqara mahkemesiniñ qararını, nasıl olsa da, tanıycaq, çünki davanıñ iştirakçisi ola.

Halqara mahkeme dört kün devamında – mart 6-9 künleri – eki tarafnıñ delillerini diñledi, bundan soñ taqdim etilgen delillerni baqacaq. Qarar tez şekilde çıqarılmaycaqtır, çünki mesele eki devlet arasındaki davanen bağlı. Ukraina adliye naziri Pavel Petrenkonıñ fikrince, dava tahminen 5-7 yıl devamında baqılacaq. Lâkin, ekspertlerniñ tahminlerine köre, qarar 2-4 yıldan soñ alınacaq, Rusiyege nisbeten muvaqqat tedbirler kirsetilüvi aqqında qarar ise BMT Halqara mahkemesi tarafından aprel soñuna qadar çıqarılacaqtır.

Bunen beraber, Gaagadaki Halqara cinaiy mahkeme (HCM) Ukrainanıñ muracaatı boyunca Qırımnıñ Rusiyege qoşulması meselesinen bağlı cinaiy iş açıp olamay. Bu aqta HCM resmiy temsilcisi Fadi El-Abdalla UNİAN agentligine bildirdi. Onıñ sözlerine köre, 2017 senesinden başlap HCM-nıñ yañı vazifesi peyda ola bile – tecavuznen bağlı davalarnı baqmaq, bu vazife çerçivesinde Qırımnıñ Rusiyege qoşulması baqıla bilecek. Amma qarar işke tüşürilgende, bundan evel yüz bergen vaqialar baqılmaycaqtır.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.