Ormanda coyulğan 3 yaşındaki Ablâkimni vatandaşlar ziyaret ete

15.03.20179:45

Ormanda coyulğan ve o yerde bütün gece devamında bulunğan 3 yaşındaki Ablâkim Ablâkimovnıñ ana-babası vatandaşlarına teşekkür bildire. O vaqıt balanı tapmaq içün bir qaç biñ qırımtatar toplaştı.

«Kelgenler çoq sağ olsunlar!» – dep ayta oğlannıñ anası Lemara Ablâkimova.

Adamlar Qırımnıñ çeşit köşelerinden Qarasuvbazar (Belogorsk) rayonınıñ Köktaş (Sinekamenka) köyüne tahminen saat 17:00-de, qarantlıq ve suvuq tüşkende, kelip başladı.

«Er kes öyle quvandı ki, dersiñ, menimki degil de, öz balasını taptılar!» – dep añlata oğlannıñ babası Qurtveli Ablâkimov.

Bu vaqia yüz bergeninden soñ aman-aman er kün Ablâkimovlar evine oğlannı ziyaret etmek içün adamlar kele. Ablâkimniñ sağlığı endi yerinde, o, balalarnen oynay ve o vaqıt ketken yolçıqnı ve ne yerde coyulğanını ep köstere.

Ablâkim Lemara ve Qurtveli Ablâkimovlarnıñ beş balasından eñ kiçigi ola. Bütün balalarğa milliy terbiye berile. Meger, anası tüşündi ki, Ablâkim eñ büyük tatasınen ormanğa ketti, lâkin belli oldı ki, oğlan o yerge 6 yaşındaki tatası Safiye ve 7 yaşındaki qomşu oğlannen bardı, biraz vaqıt keçken soñ olar Ablâkimni coydı, dep bildire Crimeantatars.club.

Avdetniñ evel bildirgenine köre, mart 4-te Ablâkim büyük balalarnen beraber ormanğa aqbardaqlarnı cıymağa barğan, amma bir an ğayıp olğan. Oğlannı bütün köy sakinleri qıdıra edi, qıdıruvğa yarımadanıñ çeşit köşelerinden kelgen qırımtatarlar qoşuldı. Ablâkim tahminen 17 saat devamında ormanda bulundı, onı saba saat 5-te evinden bir qaç kilometr uzaqlığında taptılar. Oğlan tapılğanda, ilk olaraq, onıñ tatası qayda olğanını soradı. Bundan soñ bala Qarasuvbazar merkez rayon hastahanesine umumiy aşırı suvutma diagnozı ile ketirildi.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Author: Редакция Avdet

Avdet gazetası