Mart 15-te Aqmescit Merkez rayon mahkemesiniñ «fevral 26 işi» boyunca toplaşuvı çerçivesinde prokuror adliyeci Cemil Temişevniñ davadan çıqarılması aqqında şefaat arizasını berdi.
Bu aqta adliyeci Edem Semedlâyev video muracaatında bildirdi.
«Prokurornıñ fikrince, o, bundan evel bu iş boyunca daa eki adamnı imaye etken edi: Talât Yunusov ve Eskender Nebiyevni, bunen beraber Arsen Yunusovnı imaye ete. Olarnıñ menfaatları farqlı olğanı sebebinden, prokurornıñ fikrince, adliyeci Temişevni davadan çıqarmaq kerek. Bütün adliyeciler qarşı oldı, tek bir adliyeci ayttı ki, prokurorğa qol tuta ve böyle vaziyette Temişev tarafından imzalanğan bütün dava vesaqalarını cinaiy işten çıqarmaq ve prokurorğa qaytarmaq kerek olğanını bildirdi», – dep añlattı Semedlâyev.
Adliyeciniñ bildirgenine köre, mahkemeci bir saatqa muşavere odasına ketti, lâkin qarar çıqarmadı, toplaşuv mart 16-ğa keçirildi.
«Er kes şaştı, çünki böyle şey beklenilmegen edi. Bellesem, menfaatlar davası yoq, uquq tarafından noqta-i nazar birdir. Prokuratura, meni davadan çıqarmağa tırışıp, nege esaslanğanını şimdi añlatıp olamayım», – dep ayttı Temişev, bildire «Qırım.Aqiqat».
Fevral 27-de adliyeci Nikolay Polozov bildirdi ki, qırımtatar faali Ahtem Çiygoznıñ işi boyunca mahkemede bundan evel mahküm etilgen Eskender Nebiyev, Talât Yunusov ve Arsen Yunusovnıñ sorğuğa çağırılıması aqqında prokurornıñ şefaat arizası qanaatlendirildi. Sorğuğa çekilgen üç kişi yaqalanğan adamnıñ 2014 senesi fevral 26-da Qırım Yuqarı Şurası binası yanında keçirilgen miting vaqtındaki areketleri aqqında bir şey aytmadı.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
