Amerika Devlet departamenti: Qırım Ukrainağa qaytarılacağına qadar sanktsiyalar devam etecek

17.03.201710:07

Amerika Birleşken Ştatları (ABŞ) 2014 senesi Qırım baari vaqialarını tanımay. Qırım boyunca sanktsiyalar yarımada Ukrainağa qaytarılacağına qadar devam etecek.

Bu aqta ABŞ Devlet departamentiniñ mart 16-da müessise saytında yerleştirilgen beyanatında bildirile.

Devlet departamentinde ilân ettiler ki, yarımadada 2014 senesi mart 16-da keçirilgen referendumnıñ neticelerini tanımaylar. İlânda Qırımnıñ Rusiyege qoşulması işğal dep adlandırıla, ve qayd etile ki, Moskva halqara uquqnı bozmağa devam ete.

Avdetniñ evel bildirgenine köre, mart 15-te Avropa parlamentiniñ matbuat merkezinde Bağçasarayda qaçırılğan Ervin İbragimovnıñ babası Umer İbragimov, «fevral 26» işi boyunca yaqalanğan Mustafa Degermenciniñ babası Bekir Degermenci, bunen beraber, Qırım adliyecisi Emil Kurbedinovnıñ iştiragi ile matbuat konferentsiyası keçirildi.

Mart 13-te Avropa birligi Şurası Ukraina topraq bütünligi ve mustaqilligini bozuvnen bağlı kirsetilgen sanktsiyalarnı daa yarım yılğa uzattırdı. Bu müddet 2017 senesi sentâbr ayına qadar devam etecek.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.