Qarasuvbazar rayonındaki ormanlarda ğayıp olğan qırımtatar kişini FVN hadimleri qıdırdı

18.03.201714:45

Qarasuvbazar (Belogorsk) rayonınıñ dağ-ormanlarında ğayıp olğan Mudessir İsayevni Fevqulade vaziyetler nazirligi (FVN) hadimleri ve köy sakinleri qıdırdı, amma qıdıruv neticesiz oldı. Ormanda tek onıñ balta ve çuvalı tapıldı.

Aqay kişi 65 yaşında, onıñ közleri yaramay köre.

Evel bildirilgenine köre, Qarasuvbazar (Belogorsk) rayonınıñ dağlı yerlerinde yerleşken Sartana (Alekseyevka) köyünde aqay kişi ğayıp oldı.

Beş kün evel Mudessir İsayev köpeginen beraber ormanğa odun almaq içün ketti. Bir künden soñ köpegi qayttı.

Aqay kişiniñ qorantası onıñ içün pek qasevetlene ve onı qıdırmağa yardım etmege çağıra.

«Ğayıp olğan kişi aqqında bir-de-bir malümatı olğan er kesni nevbetteki telefon nomeri vastasınen bildirmege çağıramız: +7 978 742 57 92 – oğlu Mustafa», – dep çağırdı «Açıq yürekler» taqımınıñ qırımtatar göñüllileri.

Avdetniñ evel bildirgenine köre, mart 4-te bir qaç biñ qırımtatar Qarasuvbazar rayonınıñ Köktaş (Sinekamenka) köyü yaqınlarında yerleşken ormanda 3 yaşındaki Ablâkim Ablâkimovnı tapmağa yardım etti.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Фото аватара

Автор: Редакция Avdet

Редакция AVDET