«Eurovision» ğalibi Jamala Viva mecmuasınıñ versiyası boyunca «Devlet ğururı» oldı.
«VIVA! 2016 senesiniñ eñ güzelleri. Yañı baqış» mukâfatlandıruv merasimi mart 18-de Ukraina Milliy sanat sarayında keçirildi ve bu sene qoşma namzetlikler, bu cümleden «Devlet ğururı» namzetligi, taqdim etildi.
Jamala merasimde ukrain dizayneri Katâ Silçenko tikken anterde peyda oldı. Yırcı öz mukâfatını kiyevi Seit-Bekirge bağışladı.
«Cümlemizge sevgi tilemege isteyim, çünki sevseñ, eñ güzel olasıñ. Bu mukâfatnı sevgilime bağışlayım», – dep sanada ayttı yırcı.
VIVA neşriniñ baş muarriri İvanna Slaboşpitskaya qayd etti ki, Jamala Ukrainanı birleştirdi.
«Devlet ğururı» namzetligi, devletimizni, farqlı muzıkanı sevgenlerni birleştirgen insan bizge ğururlanmaq içün sebep berdi», – dep Jamalanıñ ğalebesine izaat berdi Slaboşpitskaya.
Avdetniñ evel bildirgenine köre, Jamala añlattı ki, olarnıñ Seit-Bekir Suleymanov ile toyu Kiyevde yapılacaqtır, amma böyle merasim içün eñ güzel yer Qırım olur edi.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
