Mart 20-ge keçer gecesi belli olmağan şahıslar Kezlevde (Yevpatoriya) «Yevpatoriyskaya zdravnitsa» bütün Rusiye mustaqil neşiri mühbiri Sergey Ovsânnikovnıñ avtomobilini yaqtı.
Vaqia tahminen saat 03:35-te Demışev soqağındaki ev azbarında yüz berdi. Bu yerde mühbirniñ oğlu yaşay. O, pencereden yanğan maşnanı körip, yanğıncılarnı çağırdı. O, azbarğa çıqıp, avtomobil üstünde yaqarlıq ile şişeni kördi, onıñ içinden yanğan qarışma töküle edi.
Yigit yanğıncılarnı çağırdı, bundan soñ maşnadan ateş söndüricini çıqardı ve yardımğa kelgen qomşularnen beraber yanğınnı söndürmege tırıştı. Olar yanğınnı yanğıncılarnıñ kelmezden evel söndürdi. Yanğıncılar ise, çağırılğan soñ, 19 daqqa keçken soñ keldi. Avtomobil pek zararlandı.
Ovsânnikovnıñ sözlerine köre, maşna yaqması, mart 14-te «Yevpatoriyskaya zdravnitsa»nıñ soñki sanında derc etilgen «Kaluga» ameliyatınıñ batması» maqalesi içün intiqam ola bile. Maqalede Kezlev memuriyeti tarafından 2015 senesi çoq qatlı ev içün topraq satıluvı boyunca dolandırıcı topraq mezatı keçirilgeni aqqında añlatıla, bu mezatnıñ neticeleri, Qırım prokuraturası açtırğan dava boyunca, yavaş-yavaş bütün seviyedeki mahkemeler, bu cümleden Kaluga şeerindeki Merkeziy okrug Arbitraj mahkemesi tarafından lâğu etildi. Bundan da ğayrı, bir yıl devamında çalışıp, mustaqil «Yevpatoriyskaya zdravnitsa» belediye memurlarınıñ qabarcılıq faaliyetine onlarca maqaleler bağışladı, dep bildire «Primeçaniya».
Avdetniñ evel bildirgenine köre, Aqmescitte (Simferopol) General Vasilyev soqağında yerleşken anbar yanındaki turaqta MAN TGS yük maşnası yandı.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
