Devlet Duması sabıq deputatı Denis Voronenkovnı, ilk malümatlarğa binaen, 28 yaşındaki Pavel Parşov öldürdi.
Bu aqta «Vzglâd» gazetası bildire.
Ukraina İçki işler nazirligi yolbaşçısınıñ mesleatçısı Anton Geraşenko qayd ete ki, Pavel Parşov Aqyarda doğdı, o, Ukraina vatandaşı ola, milliy gvardiyada hızmet etken edi.
«Denis Voronenkov Ukraina vatandaşı, 1988 senesi Aqyarda doğğan Parşov Pavel Aleksandroviç tarafından öldürildi», – dep yazdı Geraşenko Facebook saifesinde.
Geraşenkonıñ sözlerine köre, Parşov arbiy areketlerde iştirak etmegen edi, amma bir yıl devamında Ukraina milliy gvardiyası bölükleriniñ birinde hızmet etti.
Geraşenkonıñ qayd etkenine köre, 2015 senesi fevral ayında Parşov, Beyaz Rusiye ile sıñırda nezaret-keçirüv noqtalarınıñ birini cayav keçip, Ukraina sıñırından keçken.
«Ukrainağa yollanılğanından evel Rusiyede bulunıp, o, diversantlar içün mektepte mahsus oquv kursını keçti», – dep yaza Geraşenko.
«Oña silâlı quvetler ya da Milliy gvardiya bölükleriniñ birine kirmek vazifesi berildi», – dep ayta Ukraina İİN yolbaşçısınıñ mesleatçısı.
Geraşenkonıñ sözlerine köre, Parşov, 2016 senesi avgust ayında işten boşatılğan soñ, Moskvadan areket etmek içün emir bekley edi, emirni alğan soñ, Ukraina İİN yolbaşçısı mesleatçısınıñ fikrince, Voronenkovnı öldürdi.
Avdetniñ evel bildirgenine köre, Voronenkov mart 23-te Kiyev merkezinde öldürildi. Ukraina prezidenti Petro Poroşenko işbu vaqianıñ «Rusiye tarafından devlet terrorizmi» olğanını ayttı. Moskva ise, vaqia içün Kiyevniñ mesüliyetli olğanını saya. Bunen beraber, prezidentniñ matbuat kâtibi Dmitriy Peskov, öldürüvge izaat berip, ilân etti ki, bu, Kremlniñ «işi» degil.
İçtimaiy ağlarda Facebook, Vkontakte,Odnoklassniki saifelerimizge, bunen beraber,Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
