Qırım deputatı Edip Gafarov kefalet arizasını berdi, amma vesiqa mahkemede qabul etilmedi

27.03.201716:45

Qırım Devlet şurası milletlerara meseleler boyunca komitetiniñ yolbaşçısı Edip Gafarov ilân etti ki, «fevral 26» işi boyunca yaqalanğanlarnıñ biri, apiste bulunğan Mustafa Degermenci onıñ kefalet arizasınen çıqmama aqqınen azatlıqqa yiberildi.

Bu aqta o, qırımtatarlarnıñ menfaatlarını qorçalağan rusiyeli adliyeci Mark Feyginniñ Amerika Birleşken Ştatlarına ziyaretine «Kommersant» neşrine bergen izaatında bildirdi. O yerde Feygin «Qırımda siyasiy sebeplerden qırımtatarlarnıñ cinaiy taqip etilüvi mümkün olmağanı aqqında» ABŞ Kongressi rezolütsiyasınıñ qabul etilmesini talap etecektir.

«Maña tek Mustafa Degermenciniñ ana-babası ve adliyecileri muracaat etti, olar, onıñ cezası çıqmama aqqı aqqında vesiqa imzalanğanına deñiştirilsin dep, kefalet arizasını bermemni soradı. Onıñ qorantasını yahşı bilem, ve imza qoydım, onı yiberdiler», – dep ayttı Edip Gafarov.

Mustafa Degermenciniñ tatası Mavile qayd etti ki, olarnıñ qorantası, kerçekten de, Gafarovğa kefalet arizası berilmesi içün muracaat etken edi, ve o razı oldı. Lâkin, mahkemede kefalet arizası qabul etilmedi ve Mustafa Degermenci apiste qaldı. Bunen beraber, Gafarov Mustafa Degermenciniñ anasını qabul etken şekli, iç te deputatnıñ «qorantanı yahşı bilgenini» bildirmey.

«Anam yüzünde közyaş olıp kabinetiñizge kelgende, siz bu kâqıtqa imza atmaq içün zornen beş daqqa ayırdıñız, amma onı «mahkemede» ciddiy saymadılar, ve sizni ağam, qorantam ve tüşkenimiz vaziyet iç te meraqlandırmay edi!!! Siz tek bunı ayttıñız: «Vaqtım az! Neni anda imzalamaq kerek? Sağlıqnen barıñız», – dep yazdı Mavile Degermenci, Edip Gafarovğa içtimaiy ağlarda muracaat etip.

Bunen beraber, Mavileniñ fikrince, kefalet arizası, Mustafa Degermenci taqiqatnen işbirlik tutmaqnı red etkeni sebebinden tesir etmedi.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Author: Редакция Avdet

Avdet gazetası