Qırım mühbirleri qurulacaq Cuma cami yanında çam terekleri yoq etilüvinden qasevetlenip başladı

27.03.201715:20

Qırım mühbirleri taqımı Aqmescit (Simferopol) suv anbarı qorunğan zonasında sanki kontrol etilmegen çam terekleri yoq etilüvinden memnün degil. Lâkin, Qırım müftiyatı matbuat hızmetinde añlattılar ki, bu mesele ükümet temsilcileri ile endi uyğunlaştırıldı ve bütün kerekli tedbirler yapıldı.

«Cuma caminiñ qurulayatqan memuriy binası. Aqmescit suv anbarı qorunğan zonasında kontrol etilmegen çam terekleri yoq etilüvi yavaştan devam ete. Ve bu, Cuma cami rayonında büyük naqliye parkı bulunacaq yeri Aqmescit memuriyeti tarafından daa tasdıqlanmağan vaqıtta yapıla. Daa ne qadar terek yoq etilecek?» – dep yazdı «Rusiye gazetası» Qırım bölüginiñ mühbiri İlya İzotov Facebook saifesinde.

Oña diger Qırım mühbirleri, bundan da ğayrı, tatarofob noqta-i nazarınen belli olğan bazı yarımada sakinleri de qol tuttı.

Qırım musulmanları diniy idaresiniñ malümat ve neşriyat bölügi hadimi Zera Emirsuin añlattı ki, QMDİ tereklerni yoq etmek içün bilet aldı ve 3 million 600 biñ ruble töledi, 300 terek oturtması içün nomer aldı. Bundan da ğayrı, kompleks territoriyasında bulunğan Livan sedir «saqlanılğan, qoralanğan ve qoruna». Naqliye parkı ise, kompleks territoriyasında, yani yolda degil de, bu 2,7 ga toprağında bulunacaq.

Bundan da ğayrı, Zera Emirsuin qayd etti ki, bazı faaller ve mühbirler tereklerniñ yoq etilüvi içün farqlı qasevetlene. Meselâ, Gurzufta yoq etilgen servi alleyası o qadar qasevetni peyda etmedi.

Aynı vaqıtta muzakerelerniñ bazı iştirakçileri qasevetni bildirgen kişiler milletlerara munasebetlerni bozğanını ayttı.


Avdetniñ evel bildirgenine köre, bu sene yanvar ayında haber etildi ki, Gurzufta «Artek» bala lageri reberiyetiniñ emirinen «Gurzuf-aziz» qadimiy musulman mezarlığı yoq etilip başladı.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Author: Редакция Avdet

Avdet gazetası