Qırımtatar atlı askerleri duşmanlarnı apokalipsis şoku alına ketire edi

28.03.201716:34

Qırım hanlığı atlı askerleriniñ areket tarzı duşmanlarnı apokalipsis şoku alına ketire edi. Qırımnı 17-ci asır ziyaret etken frenk seyahatçısı Giyom de Boplan baba-dedelerimizniñ «esapsız polk» kibi körüngen hayalnı, yani böyle bir arbiy sağınnı nasıl etip yapqanını añlattı.

«Tatarlar sırada 100-er dane, aslında 300-er dane atnen sıranen kete, çünki er tatar yanında daa eki atnı, deñiştirmek imkânı olsun dep, tizginnen alıp kete. Olarnıñ birinci sırası (keñligi) 800-den 1000-ge qadar adımdan ibaret ola bile, içerige ise – üç ve dört büyük lyeden (qarada bir lye 4444,4 metrden ibaret, – Avdet) ibaret ola bile, eger sıq sıranen ketken olsalar; akis alda, olar, 10 lyeden ziyade mesafege tarqatıla. Bunı ilk sefer körgenler içün bu, unutılmaz bir manzaradır, çünki 80 biñ tatar 200 biñden ziyade atnı alıp bara; böyle alda, çölde atlarnıñ sayısı ormandaki tereklerniñ sayısından ziyadedir. Olarnı uzaqtan körseñ, öyle körüne ki, ufuqta nasıldır bulut peyda ola, ve yaqınlaşqanınen daa büyük ola, bu ise, eñ cesür olğanlarnı da qorquza; men, böyle büyük polklarnı körmege alışmağanlarnı aytam. Böyle etip, bu büyük ordu areket ete, er bir saat on beş daqqağa toqtay, atlarğa siymek içün imkân bere, bu atlar ise, o qadar terbiyelengen ki, toqtatılğanda bunı yapa».

Frenk riyaziyatçısı (matematik), müendis ve arbiy haritacı Giyom Levasser de Boplan (tahminen 1595-1685) avropalılar içün Qırım üstündeki perdeni açqan birinci insan olğanınen bellidir. Öz közetüvlerini «Qırım ya da Tatariya yurtu aqqında» dep adlandırdı.

Avdetniñ evel bildirgenine köre, Giyom de Boplan içün, o zamandaki er angi avropalı içün kibi, tatarlar – yavuz basqıncı edi. Qırımtatarlar frenkke … Amerika yerlilerini añdırdı.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.