Keçken afta soñu qırımtatarlar cemaat yardımına, yani talaqağa toplaştı. İçtimaiy ağlardan yardım kerek olğanı aqqında haber eşitip, olar, «Hizb ut-Tahrir» işi boyunca yaqalanğan Teymur Abdullayevniñ evini qurıp bitirmege yardım etmek içün keldi.
Onıñ qorantası – apayı Alime ve 5 balası – bir odada yaşay. Bu yerde aş pişire, aşay, yuqlay ve derslerini yapalar. Qalğan odalarnı Teymur bitirip yetiştirmedi. Çoq balalı qorantağa yardım etmek içün qırımtatarlar toplaştı, olarnı aile dostu Remzi Bekirov toplaştırdı. O, içtimaiy ağlarda ilân etti ve onıñ muracaatına o qadar çoq adam cevap bergeninden taaciplendi, dep bildire Crimeantatars.club.
Aqaylar, kerekli qurucılıq malzemelerini satın alıp, yağmur yağğanına baqmadan, tamir işlerini başladı. Bu iş eki kün devam etti, göñülli qurucılar eki odada qaba sılavnı yaptı, azbarda ayaqyol içün plita qoydı, fasadnıñ qaba sılavını yaptı. Olar, kerek olsa, bir daa toplaşmağa ve yardım etmege azır.
Remzi Bekirovnıñ malümatına binaen, talaqada tahminen yigirmi adam iştirak etti, olarnıñ arasında Qarasuvbazar (Belogorsk), Eski Orda (Lozovoye), Mamut Sultan (Dobroye), Büyük Onlar (Oktâbrskoye), Molodöjnoye, Sudaq, Otuz (Şebetovka), Mamaq (Stroganovka), Aqmescitten kelgen aqaylar oldı.
Teymur Abdullayevniñ apayı yardım etkenlerge teşekkür bildirdi.
Qayd etmek kerek ki, bu, qırımtatarlar yardımğa toplaşqan ilk sefer degildir. Yaqında yüz bergen vaqia: tahminen 5 biñ qırımtatar kişi ormanda coyulğan 3 yaşındaki Ablâkim Ablâkimovnı tapmaq içün toplaştı.
Avdetniñ evel bildirgenine köre, «Hizb ut-Tahrir» işi boyunca Aqmescitte (Simferopol) yaqalanğan Teymur Abdullayev yaqınlarına qırımtatar tilinde mektüp yazğanı içün kartserge qapatıldı.
Foto: Remzi Bekirov.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
