Aqmescitte yañı qasaba quruluvı planlaştırıla

29.03.201710:05

Aqmescitniñ (Simferopol) şimal-şarqiy qısmında yañı «Krımskaya roza» («Qırım gülü») adlı qasaba qurulacaq, onıñ meydanı bir kvadrat kilometrden ziyade olacaq.

Qasaba leyhasınıñ taqdimi Qırım Nazirler şurası toplaşuvında, QC baş nazir muavini Vitaliy Nahlupinniñ reisliginde keçirildi.

Umumen olaraq, qasabada 21 biñ adam yaşaycaq. Yañı qasabada daire fiyatı 1,7 milliondan 3,5 millionğa qadar rubleni teşkil etecek, bir kvadrat metrniñ fiyatı 47 biñ rubleden başlana.

Bu yerde 1550 bala içün bala bağçası, eki biñ talebe içün eki mektep, kitaphane ile bala ve gençler icadı klubu (600 yer içün), meydanı biñ kvadrat metrden ziyade ibaret olacaq sport kompleksi, azbardaki sport meydançıqları qurulacaq. Bunen beraber, 89 yataq yeri ile tibbiy merkez inşaat etilecek.

Bundan da ğayrı, qasabada kilse ve cami qurulacaq.

«Krımskaya roza» qasabasınıñ esas obyekti, suv sport çeşitleri boyunca olimpik azırlav merkezi olacaq. Binanıñ umumiy meydanı 19 biñ kvadrat metrni teşkil etecek. Tahminlerge köre, olimpik merkez bütün sene devamında çalışacaq.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Author: Редакция Avdet

Avdet gazetası