Qırım şarqında YAHDİ hadimleri maşnanı qaçırğan kişige ateş açtı

29.03.201717:00

Yedi Quyuda (Lenino) Yol areketi havfsızlığı devlet inspektsiyası (YAHDİ) hadimleri maşnanı qaçırğan kişige ateş açmaq mecbur oldı.

Bu aqta Rusiye Federatsiyası İçki işler nazirligi Qırım boyunca idaresiniñ matbuat hızmeti bildire.

Müessiseniñ malümatına binaen, maşna qaçırılğanı aqqında haber kelgende, İİN bölüginiñ hadimleri naqliyeniñ bulunğan yerni tez belgiledi, o, Kefe (Feodosiya) tarafına kete edi.

Qanun boyunca naqliyeni toqtatmaq talabına aydayıcı cevap bermedi. Qaçqanda, dümen başındaki vatandaş politsiyanıñ avtomobiline bir qaç kere urdı, Hafuz (Primorskiy) köyünde ise, bir daa urıp, uquq qoruyıcılarnıñ maşnasını bozdı, bundan sebep onı taqip etmek imkânsız oldı.

Operativ-qıdıruv tedbirler çerçivesinde uquq qoruyıcılar dümen başında olğan adamnı belgiledi, bundan soñ ise, vatandaş özü qabaatını tanıp keldi. O, qaçırılğan naqliye saibiniñ 24 yaşındaki oğlu oldı.

Keçirilgen iş teşkerüvi neticesinde belgilendi ki, politsiya hadimleri tarafından silâ qanun boyunca qullanıldı.

Şimdiki vaqıtta yaşqa nisbeten Rusiye Federatsiyası Cinaiy kodeksiniñ 166-cı maddesi 1-ci qısmı (qaçıruv) boyunca cinaiy iş açıldı.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Фото аватара

Автор: Редакция Avdet

Редакция AVDET