Ukrain deputatlarını Meclisni Nobel mukâfatına namzet olaraq taqdim etmege çağırdılar

29.03.201711:55

Qırımtatar Milliy Meclisiniñ (Rusiye Federatsiyasında 26.04.2016 senesi yasaq etilgen) 2018 senesi Nobel dünya mukâfatına namzet olaraq taqdim etilüvi teklif etildi.

Ukraina halq deputatlarına alâqalı açıq mektüp-muracaatnı qırımtatar milliy areketi faalleri İlmi Umerov ve endi eki yıldan ziyade apiste bulunğan Ahtem Çiygoz azırladı.

Mektüp müellifleri, olarnıñ teşebbüsine halq deputatları, em de olarnıñ Avropa ve Amerikalı zenaatdaşları qol tutacağına ümüt beslegenini bildirdi.

«Ümüt etemiz ki, qırımtatar narazılığı nafile degildir, bizim nümünemiz dünyanıñ çeşit köşelerinde biñlerce adamlarnı azatsızlıqqa ve zorbalıqqa qarşı küreşke ilhamlandırır», – dep aytıla mektüpte.

Avdetniñ bildirgenine köre, 2011 senesi o vaqıt Meclis reisi olğan Mustafa Cemilev Nobel dünya mukâfatına namzet olaraq kösterilgen edi.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Author: Редакция Avdet

Avdet gazetası