Mart 29-da Aqmescitte (Simferopol) yaqalanğan Belâl Adilov Rusiye Federatsiyası Cinaiy kodeksiniñ 318-ci maddesi 1-ci qısmı (ükümet temsilcisine, ya da onıñ yaqınlarına nisbeten, onıñ iş vazifelerini yapqanınen bağlı, ömür ya da sağlıq içün havflı olmağan zorbalıq etüv, ya da zorbalıq etile bilgeni) boyunca şeklenile.
Bu aqta onıñ adliyecisi Edem Semedlâyev Aqmescitteki Kiyev rayon Taqiqat komitetini ziyaret etkeninden soñ bildirdi.
Avdetniñ evel bildirgenine köre, mart 29-da Aqmescitte (Simferopol) Qırım Cumhuriyeti Yuqarı mahkemesi binası yanında maskalı belli olmağan şahıslar qırımtatar kişi Belâl Adilovnı tuttı ve alıp ketti. Faalni alıp ketken adamlar özüni tanıtmadı ve «yaramay davrandı». Yüz bergen vaqianı videoğa çıqarğan şaatlardan biriniñ elinden cep telefonını urıp taşladılar.
«Onı Boğurçada (Kamenka) keçirilgen tintüvler (fevral 21-de Marlen Mustafayevniñ evinde keçirilgen tüntüv, – Avdet) vaqtında politsiya hadimlerini, olarnıñ soy-soplarına yaramay bir şey yapacaq dep, qorquzğanınen qabaatlaylar», – dep añlattı adliyeci.
İşbu videonı adliyeci internette paylaştı. Videoda uquq qoruyıcılar tintüv keçirilgen vaqıtta özüni pek keskin alıp barğanı sebebinden peyda olğan söz qavğası kösterile.
Semedlâyevniñ sözlerine köre, şimdiki vaqıtta Adilov muvaqqat bulunma izolâtorına yollanıldı, mart 30-da onıñ işi boyunca mahkeme keçirilecek, cezası belgilenecek.
O qayd etti ki, Adilovnıñ yaqalanuvınen bağlı bütün taqiqat tedbirleri Rusiye Federatsiyası Cinaiy-esnas kodeksiniñ keskin bozuluvınen keçirildi. Aqay kişini maskalı adamlar qaçırdı.
Adliyeci Semedlâyev bildirdi ki, onıñ müşterisine basım yapıldı, ondan qabaatını tanığamağa ve işbirlik aqqında añlaşmanı imzalamağa talap etken ediler. Amma o, bunı red etken ve adliyeci berilmesini talap etken edi. Bundan da ğayrı, Semedlâyev haber etti ki, esnas keçirilgende vaqtı kelgen namaznı qılmağa oña ve Adilovğa keskin şekilde yasaq ettiler.
«Bundan soñ imaye etkenim insan asıl da laf etmemek qararını aldı, çünki namaz qılmaq, onıñ içün printsipial edi, bundan soñ taqiqatçı namaz qılmağa ruhset berdi», – dep ayttı Semedlâyev.
Bunen beraber, Adilov tahminen 10 saat devamında aş ve suvsız edi.
Rusiye Federatsiyası Cinaiy kodeksiniñ 318-ci maddesi 1-ci qısmı eki yüz biñ rublege qadar ya da mahküm etilgen insannıñ on sekiz ay müddetindeki aylığı ya da başqa keliri miqdarında para cezasını, ya da beş yılğa qadar mecburiy işler, ya da altı ayğa qadar yaqalanuv, ya da beş yılğa qadar apiske qapatıluv şeklinde cezanı közde tuta.
Avdetniñ bildirgenine köre, fevral 21-de Marlen Mustafayevniñ Boğurçada (Kamenka) evinde OMON iştiragi ile tintüv keçirildi. Mustafayevden ğayrı, uquq qoruyıcılar oña destek köstermek içün kelgen daa 10 kişini yaqaladı. Olarğa 5 künge memuriy yaqalav cezası belgilendi, Mustafayev ise, içtimaiy ağlarda ekstremistik timsallerni paylaşqanı içün (Memuriy qanun bozuvı aqqında kodeksniñ 20.3-ci maddesi) 11 künge apiske qapatıldı.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
