Qırımda ukrain mühbiri ve daa eki qırımtatar faali yaqalandı

30.03.201714:44

Mühbir, www.article20.org resursınıñ korrespondenti Taras İbragimov, qaysı biri bu neşirde resmiy olaraq ve diger ukrain neşirler içün çalışa, Qırımda yaqalandı.

Onen beraber, Ekstremizmge qarşılıq merkezinde bundan evel tintüv keçirilgen ev yanında bulunğanları içün memuriy mesüliyetke celp etilgen faaller Osman Arifmimetov ve Riza İzetov yaqalandı. O vaqıt olar, qanunsız miting teşkil etkeninen qabaatlandı ve 5 künge yaqalandı.

Bir yarım saat keçken soñ Taras İbragimov azat etildi. O añlattı ki, onen normal şekilde laf ettiler, Qırımda nenen oğraşqanını, ne aqqında yazğanını soradılar. O, yazı şeklinde añlattı. Mühbirniñ sözlerine binaen, «E» merkeziniñ hadimleri onı malümatnı tek bir taraftan aydınlatqanınen yüzledi, izaatlar içün öz kontaktlarını teklif etti ve onıñ maqalelerini közetecekler dep, söz berdi. Subet adliyecisiz keçirildi.

İbragimov, Arifmimetov ve İzetovnıñ yaqalanuvı sebebi, olarnıñ nizam obyekti yanında bulunmasıdır: olar «E» merkezi yanındaki yol qarşısında, Dekabristov soqağında bulunıp, bugün diger yaqalanğan kişini Remzi Bekirovnı bekley edi.

Avdetniñ evel bildirgenine köre, bugün, mart 30-da Aqmescitte (Simferopol) daa bir qırımtatar faali Remzi Bekirov yaqalandı. O, Vkontakte içtimaiy ağında yasaqlanğan malümatnı paylaşqanınen qabaatlana. O, Rusiye Federatsiyası Memuriy qanun bozuvı aqqında kodeksiniñ 20.29-ci maddesi boyunca qabaatlana bile.

Hatırlatamız ki, mart 29-da Aqmescitte Qırım Cumhuriyeti Yuqarı mahkemesi binası yanında maskalı belli olmağan şahıslar qırımtatar kişi Belâl Adilovnı tuttı ve alıp ketti. Faalni alıp ketken adamlar özüni tanıtmadı ve «yaramay davrandı». Yüz bergen vaqianı videoğa çıqarğan şaatlardan biriniñ elinden cep telefonını urıp taşladılar. Belâl Adilov Rusiye Federatsiyası Cinaiy kodeksiniñ 318-ci maddesi 1-ci qısmı (ükümet temsilcisine, ya da onıñ yaqınlarına nisbeten, onıñ iş vazifelerini yapqanınen bağlı, ömür ya da sağlıq içün havflı olmağan zorbalıq etüv, ya da zorbalıq etile bilgeni) boyunca şeklenile.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Фото аватара

Автор: Редакция Avdet

Редакция AVDET