Bugün, mart 30-da Ekstremizmge qarşılıq merkezinde yaqalanğan qırımtatar faali Remzi Bekirov 7 yıl evel Vkontakte içtimaiy ağındaki saifede videonı paylaşqanı içün mahküm etile. İşbu akkaunt, qaysı birinde video paylaşılğan edi, Remzi Bekirov tarafından silingen edi.
Bu aqta faal Abdullah Yaqubov bildirdi.
Söz, böyle adlandırılğan «Primorskiy partizanları» (taqımnıñ ğayrı resmiy adı, onıñ iştirakçileri 2010 senesi fevral-iyün aylarında Primorskiy ülkesinde İçki işler nazirligi organları hadimlerine nisbeten aydutlıq ve ağır cinayet yapqanınen mahkeme tarafından qabaatlı tanıldı. 2010 senesi oktâbr ayında İnternette «Primorskiy partizanları»nıñ video muracaatı peyda oldı, videoda yaşlar, Rusiye Federatsiyası İçki işler nazirliginiñ hadimlerini cinayetler yapqanınen qabaatlap, qayd eteler ki, bu areketlerni añlap eteler. Video muracaatında qayd etile ki, devlette «halq imayesiz ve mütidir, amma qorqmağanlar da bar», – Avdet) aqqında video paylaşuvı aqqında yürsetile.
Remzi Bekirov «E» merkezine bundan evel yaqalanğanından soñ qaldırğan şapkasını almaq içün çağırılğan edi. O, merkez binasında yaqalandı. Bugün Remzi Bekirovnıñ işi boyunca mahkeme keçirildi.
Remzi Bekirov Aqmescit civarındaki Boğurçada (Kamenka) tintüv keçirilgen yerge kelgeni içün 5 kün memuriy yaqalav cezasını alğan on qırımtatar kişiden biri oldı. Haber etilgenine köre, o, Ekstremizmge qarşılıq merkezinde yaqalandı. O, bu yerge Boğurçada ilk sefer yaqalanğanında ondan alınğan şahsiy şeyni almaq içün keldi.
Avdetniñ evel bildirgenine köre, keçken afta soñu Remzi Bekirov «Hizb ut-Tahrir» işi boyunca yaqalanğan Teymur Abdullayevniñ evinde talaqanı (cemaat yardımı) teşkil etti.
Hatırlatamız ki, mart 29-da Aqmescitte Qırım Cumhuriyeti Yuqarı mahkemesi binası yanında maskalı belli olmağan şahıslar qırımtatar kişi Belâl Adilovnı tuttı ve alıp ketti. Faalni alıp ketken adamlar özüni tanıtmadı ve «yaramay davrandı». Yüz bergen vaqianı videoğa çıqarğan şaatlardan biriniñ elinden cep telefonını urıp taşladılar. Belâl Adilov Rusiye Federatsiyası Cinaiy kodeksiniñ 318-ci maddesi 1-ci qısmı (ükümet temsilcisine, ya da onıñ yaqınlarına nisbeten, onıñ iş vazifelerini yapqanınen bağlı, ömür ya da sağlıq içün havflı olmağan zorbalıq etüv, ya da zorbalıq etile bilgeni) boyunca şeklenile.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
