Bugün, mart 30-da Aqmescitte (Simferopol) yaqalanğan qırımtatar faali Remzi Bekirov üç kün memuriy yaqalavnen cezalandı.
Avdetniñ evel bildirgenine köre, mart 30-da Ekstremizmge qarşılıq merkezinde yaqalanğan qırımtatar faali Remzi Bekirov Vkontakte içtimaiy ağında eki videonı paylaşqanı içün mahküm etile: «Primorskoye partizanları» ile intervyu ve «Qara qırğıylar» FSB-nı patlata». O, videolarnı sanki 2009-2010 seneleri paylaştı, protokol ise, bugün tizildi. Bundan da ğayrı, video paylaşılğan saife Remzi Bekirov tarafından silingen edi.
Mahkeme qarar çıqarğanda ilk sefer mahküm etilgen insannıñ çağına yetmegen üç balası olğanını köz ögüne aldı.
Bekirovnıñ mahkemede temsilcileriniñ malümatına binaen, olar bu qararğa Qırım Yuqarı mahkemesine şikâyet etecek ola, şikâyet berilmesiniñ soñki müessisesi ise, İnsan aqları boyunca Avropa mahkemesi olacaq.
Mühbir Anton Naumlükniñ Facebook saifesinde bildirgenine köre, ilk sefer yaqalanğan vaqıtta Remzi Bekirovdan ekspertizadan keçirmek içün arap yazıları ile şapka alındı. Bugün onı Ekstremizmge qarşılıq merkezine bu şapkanı oña qaytarmaq içün çağırdılar.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
