Şimaliy Qırımda suv içilüv içün kelişmegen kibi tanıldı

30.03.201715:30

Qırım Cumhuriyetiniñ Krasnoperekopsk ve Curçı (Pervomayskoye) rayonları boyunca Rospotrebnadzor territorial bölügi Vorontsov suv aluvı içün köyler territoriyasındaki araçıqlardan 70-72 metr terenliginden çıqarılğan yerastı suvlarnı içilüv içün kelişmegen kibi tanıdı.

Vorontsov tabiat yerastı suvlarınıñ alınuvı – Krasnoperekopsk, Qart Qazaq (Tavriçeskoye), Sovhoznoye, Risovoye, Tuzla (Poçötnoye) ve Pâtihatka köyleri içün yekâne merkeziy suvnen teminleme menbasıdır. 2016 senesi suvnen teminleme sistemasından suvnı teşkerip, Rospotrebnadzor netice çıqardı ki, içilgen suv sanitar normalarına uymay.

Rospotrebnadzor alaqalı bildirmeni Krasnoperekopsk ve Krasnoperekopsk rayonı memuriyetlerine yolladı.

Mütehassıslarnıñ malümatına binaen, şimdiki vaqıtta Qırımda tahminen 180 yerastı suv aluvı çalışa, ve yarımadanıñ şimalinde eñ tuzlu suvdır. Aynı problema Saq, Kezlev (Yevpatoriya) ve Aqmeçit (Çernomorskoye) rayonlarında da bar.

Meseleni çezmek içün köylerde suv temizletme stantsiyaları tiklenilecek. Birinci böyle leyha Curçı rayonındaki Kamenka köyünde işke tüşürilecek.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.