Adliyeci Kurbedinov halqara mukâfatnıñ finalına keçti

31.03.201718:15

Qırım adliyecisi Emil Kurbedinov «Havflı vaziyette çalışqan uquq qoruyıcılar içün Front Line Defenders mukâfatı 2017» halqara mukafatınıñ finalına keçken beş iştirakçiden biri oldı.

Bu aqta mart 31-de Front Line Defenders teşkilâtınıñ temsilcisi Erin Kilbrayd bildirdi.

Haber etilgenine köre, mart 30-da Dublinde jüri azaları 56 devletten 142 namzetten finalğa keçkenlerni sayladı, finalğa Ukraina, Nikaragua, Vyetnam, Cenübiy Afrika ve Kuveyt uquq qoruyıcıları keçti.

«Bu uquq qoruyıcılar qattı irade küçüni kösterdi; olar, pek havflı, ömürge zarar ketire bilecek telükeden qorqmaz», – dep ayttı Front Line Defenders teşkilâtınıñ icra müdiri Endrü Anderson mart 30-da Dublinde finalğa keçkenlerniñ cedvelini bildirgende.

«Havflı vaziyette çalışqan uquq qoruyıcılar içün Front Line Defenders mukâfatı 2017» laureatı mayıs 26-da Dublin belediyesinde keçirilecek tantanalı merasimde taqdim etilecek.

Avdetniñ evel bildirgenine köre, yanvar 26-da Qırım adliyecisi Emil Kurbedinov Rusiyede yasaq etilgen «Hizb ut-Tahrir» teşkilâtı tarafından teşkil etilgen mitingden 2013 senesi videonı paylaşqanı içün mahküm etilip, 10 künge apis etildi. Bundan evel Kurbedinovnıñ dairesi ve ofisinde tintüv keçirildi.

Amnesty International halqara uquq qoruyıcı teşkilâtı Emil Kurbedinovğa qol tutqanını kösterdi ve onıñ azat etilmesini talap etti. Bundan da ğayrı, rusiyeli adliyeciler oña destek köstergenini bildirgen açıq mektüp ile muracaat etti.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Фото аватара

Автор: Редакция Avdet

Редакция AVDET