Mart 31-de Aqmescit (Simferopol) rayonınıñ Saraylı Qıyat (Mirnoye) köyünde yanğın yüz berdi.
Bu aqta şaatlar içtimaiy ağlarda bildire.
İlk malümatlarğa köre, yanğın tahminen saat 11-de Fruktovaya soqağında yüz berdi. Bundan soñ yanğından çıqqan tuman şeerden köründi. Bundan da ğayrı, şaatlar bildire ki, yanğan ev patladı. Patlav sebebi gaz balonı oldı. Ev saibi ateş peyda olğanından 55 daqqa devamında bina damında bulundı, bundan soñ adamlar onı qomşu azbar tarafından o yerden tüşürdi. Aqay kişi hastahanede buluna.
Yerli sakinlerniñ malümatına binaen, qaza yerine eki yanğıncı maşnası keldi, amma suv tez bitti. Bundan soñ daa bir qaç qurtarıcı maşnası çağırıldı. Lâkin, yerli sakinlerniñ sözlerine binaen, olarnıñ kelgenine qadar pek çoq vaqıt keçti, ve bu zaman devamında ateş söndürmek içün areket etilmedi.
Fevqulade vaziyetler nazirligi Qırım baş idaresinde añlattılar ki, yanğın aqqında haber olarğa saat 11:30-da keldi. Başta kiçik muvaqqat evçik yandı, bundan soñ ateş 2 qatlı evge keçti.
FVN-de evde patlav yüz bergeni aqqında malümatnı daa tasdıqlamadılar. Zararlanğanlar aqqında da şimdilik malümat yoq.
Ateş saat 12:42-de söndürildi. Umumen olaraq, yanğın 230 kvadrat metrni qaplap aldı.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
