Aqmescitteki (Simferopol) Kiyev rayon mahkemesi Belâl Adilovnı azat etmek qararını çıqardı, yaqalavnen cezalav aqqında taqiqatçınıñ şefaat arizası red etildi.
Bu aqta adliyeci Edem Semedlâyev bildirdi.
«Cezanıñ belgilenmesi aqqında şefaat arizasınıñ baqılması boyunca mahkeme keçirildi. Taqiqatçı yaqalav ceza olaraq belgilenmesini talap etti, lâkin prokuror bizge qol tuttı, o, şefaatqa qarşı çıqtı, çünki bu esaslanmağan: taqiqatçı taqdim etken delillerden iç biri aqiqat degil. Bunıñ içün mahkemeci şefaat arizasını qanaatlendirmedi ve Adilov azat etildi», – dep añlattı Semedlâyev «Qırım.Aqiqatqa» bergen izaatında.
Bunen beraber, adliyeci qayd etti ki, Rusiye Cinaiy kodeksiniñ 318-ci maddesi boyunca cinaiy iş açıldı, ve bugünki toplaşuvda Adilovğa qabaatlav taqdim etildi.
Avdetniñ evel bildirgenine köre, mart 29-da Aqmescitte Qırım Cumhuriyeti Yuqarı mahkemesi binası yanında maskalı belli olmağan şahıslar qırımtatar kişi Belâl Adilovnı tuttı ve alıp ketti. Faalni alıp ketken adamlar özüni tanıtmadı ve «yaramay davrandı».
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
