Qırımtatar faali Remzi Bekirov bugün üç kün memuriy yaqalavdan soñ azatlıqqa çıqtı.
Muvaqqat tutuv izolâtorı yanında onı dostları, tanışları ve lâqayt olmağan vatandaşları bekledi. Çıqqan Bekirovnı milliy muzıkanen qarşıladılar.
Video muracaatında faal ilân etti ki, özüni qaraman saymay ve özüni islâm ümmetiniñ bir parçası olğanını duyğanını qayd etti.
Evinde onı qoranta ve balaları qarşıladı, azbar kürreçiklernen yaraştırıldı. Onı qarşılağan adamlarnı Remzi Bekirovnıñ evinde pilâvnen sıyladılar. Onıñ içün fotoresim ile tort pişirildi. Bu yerde de muzıka yanğıradı, amma esasen Qavqaz avaları.
Avdetniñ evel bildirgenine köre, mart 30-da Ekstremizmge qarşılıq merkezinde yaqalanğan qırımtatar faali Remzi Bekirov Vkontakte içtimaiy ağında eki videonı paylaşqanı içün mahküm etilgen edi: «Primorskoye partizanları» ile intervyu ve «Qara qırğıylar» FSB-nı patlata». O, videolarnı sanki 2009-2010 seneleri paylaştı, protokol ise, mart 30-da tizildi. Bundan da ğayrı, video paylaşılğan saife Remzi Bekirov tarafından silingen edi. Neticede Remzi Bekirov üç kün memuriy yaqalavnen cezalandı.
Remzi Bekirov «Hizb ut-Tahrir» işi boyunca yaqalanğan Teymur Abdullayevniñ evinde talaqanı (cemaat yardımı) teşkil etken edi.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
