Kezlevde (Yevpatoriya) qırımtatarlar toplu yaşağan «İsmail-bey» qasabasında qırımtatar tilinde tasil berilgen № 18-ci mektebi içün yañı bina qurulıp başladı.
Yañı mektep qurulacaq yerde qurban çalındı. Tantanalı merasimde «İsmail-bey» qasabasınıñ sakinleri, 18-ci mektep ocaları ve yerli akimiyet organlarınıñ temsilcileri iştirak etti. Qırım müftiyatınıñ matbuat hızmeti Avdetke bildirgen malümatqa binaen, bugünki 18-ci mektep binası kiçik, bunıñ içün yañı mektep qurmaq qararı alındı. Bu yerde 450 talebe tasil ala bilecek.
Kezlev rayon imamı Eskender Memetov mektep quruvınıñ muvafaqiyetli bitirilmesi içün dua etti. Qasaba sakinleri içün işbu obyekt pek müimdir. 18-ci mektep talebeleri ve olarnıñ ana-babaları yañı mektepke büyük ümüt besley, dep bildire Qırım müftiyatınıñ matbuat hızmeti.
Belli olğanına köre, Kezlevdeki qırımtatar tilinde tasil berilgen mektep 2002 senesinden başlap çalışa. Mektepte 340 talebe oquy ve 33 oca çalışa.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
