Sankt-Peterburg şeerinde yüz bergen patlav neticesinde 10 kişi elâk oldı, 30-dan ziyade adam yaralandı

03.04.201720:12

Bugün, aprel 3-te, tahminen saat 14:40-ta Sankt-Peterburg şeerindeki «Tehnologiçeskiy institut» ve «Sennaya ploşad» metro stantsiyaları arasında trende belli olmağan patlatıcı alet patladı. Şimdilik 10 adam elâk olğanı ve 30-dan ziyade kişi yaralanğanı aqqında bildirile.

Taqiqat vaqianıñ terakt olğanını esas versiya dep saya. Bu aqta Rusiye prezidenti Vladimir Putin de ilân etti, ve «terroristik üslübinde yapılğan areket» vaqianıñ esas sebebi olğanını ayttı.

Peterburg metrosınıñ bütün stantsiyaları qapatıldı. Şeer gubernatorı Georgiy Poltavçenko fevqulade vaziyet boyunca plannı işke tüşürdi.

Teraktnıñ esas sebeplerinden biri, bu küleri Peterburg şeerinde Vladimir Putinniñ bulunması ola bilgenini aytalar. O, terakt yüz bergen vaqıtta Umumiy Rusiye halq frontu media-forumında iştirak etken edi. Lâkin, diger fikir de bar. Rusiyede terroristler daima Büyük Oruç arifesinde patlavnı yapmağa tırışa.

Bundan da ğayrı, 5 kün evel (mart 29-da) Moskva metrosında patlavlar yüz bergeninden 7 yıl toldı.

Taqiqat teraktnı yapqanında İraq ve Levant İslâm Devletini şeklene.

Bundan evel Sankt-Peterburg şeerinde teraktlar 10 yıl aralarınen yüz bergen edi: 1997 senesi – tren patlavı, 2007 senesi – «Vladimirskaya» ve «Makdonalds» yanında patlav, «Nevskiy ekspressniñ» patlavı, 2017 senesi – metroda patlav.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Author: Редакция Avdet

Avdet gazetası