Aprel 3-te Aqmescitteki (Simferopol) Jeleznodorojnıy mahkemesinde keçirilgen mahkeme toplaşuvında Nikolay Semena ayttı ki, er angi mühbirniñ Qırım statusı boyunca fikrini bildirmek ve bu status aqqında şimdiki vaqıtta dünya cemiyetinde alıp barılğan halqara muzakerelerde iştirak etmek aqqı bar.
Bu aqta Semena «Qırım.Aqiqatqa» bergen izaatında bildirdi.
Onıñ sözlerine köre, mahkeme toplaşuvında esas diqqat qabaatlavda qayd etilgen malümatnıñ müellifi belgilenmesine ayırıldı, lâkin, mühbirniñ özü 2016 senesi aprel 19-da keçirilgen birinci sorğuda müellif olğanını endi tanıdı, ve bu tasdıqlanğan malümat ola.
«Bugün meni taqip etken FSB-den şaatlarnı diñlediler. Esas diqqat, menim bu malümatnıñ müellifi olğanımnı tasdıqlağanlarına ayırıldı, amma men bunı iç red etmegen edim. Menimce, bu maqale cinayet olmağanını aytacağımız vaqıt kelecekte davanıñ baqılması daa emiyetli olacaqtır. Hususan buña taqiqat devamında az diqqat ayırıldı», – dep ayttı Nikolay Semena.
Hatırlatamız ki, Qırım prokuraturası Nikolay Semenağa nisbeten Rusiye Federatsiyası Cinaiy kodeksiniñ 280.1-ci maddesi boyunca (Rusiye Federatsiyası topraq bütünligini bozmaq içün areket etmek çağıruvlar) cinaiy işni açtırdı. Semenanıñ maqalesi, qaysı biri içün o qabaatlana, «Qırım.Aqiqat» neşrinde derc etildi, o yerde 2015 senesi avgust-sentâbr aylarında keçirilgen Qırım energetik qamaçavı aqqında söz yürsetildi. Nikolay Semena çıqmama aqqınen vesiqanı imzalağan edi. Bundan da ğayrı, daa eki adamda tintüvler keçirildi, olar bu cinaiy iş boyunca şaatlar olaraq celp etildi.
Avdetniñ evel bildirgenine köre, Rusiye Maliye monitoringi tarafından azırlanılğan terrorist ve ekstremistler cedveline Qırım sakinleri kirsetildi: Anna Andriyevskaya, İlmi Umerov, Nikolay Semena, Andrey Klimenko ve digerler.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
