Qırımda «Çiygoznıñ işi» boyunca 98-ci toplaşuv keçirildi

04.04.201710:00

Qırım Yuqarı mahkemesinde «Çiygoznıñ işi» boyunca 98-ci toplaşuvda imaye tarafınıñ şaatı Şevket Kaybullayev ilân etti ki, yaqalanğan Ahtem Çiygoz 2014 senesi fevral 26-da Qırım Muhtar Cumhuriyeti Yuqarı Radası yanında keçirilgen mitingde iç «qanunğa uymağan areketler» etmedi.

Bu aqta malümatnı adliyeci Nikolay Polozov Facebook saifesinde yazdı.

«Meclisniñ toplaşuvında (2014 senesi fevral 25-te, – Avdet) QMC Yuqarı Radası binası yanında Ukraina topraq bütünligine qol tutuv mitingini keçirmek qararı alındı. Meclis kâtibiyetine kütleviy merasim keçirüvi aqqında qabul etilgen qararnı kütleviy haber vastaları yardımınen ealige bildirmek avale etildi. Regional meclislerge haber etüv boyunca, vazifeli olğanı içün, Meclis reisiniñ muavini Zaur Smirnov mesüliyetli etildi. Şaat, Meclis toplaşuvında bulunğan Ahtem Çiygozğa kimse nasıldır vazifeler bergenini körmedi», – dep aytıla adliyeciniñ beyanatında.

Avdetniñ evel bildirgenine köre, Ahtem Çiygoz Aqmescit SİZO-sında 2015 senesi yanvar ayından başlap buluna, o, Rusiye Federatsiyası Cinaiy kodeksiniñ 212 maddesi 1-ci qısmı («kütleviy nizamsızlıqnı teşkil etüv») boyunca qabaatlana, madde boyunca qabaatlanğan kişi 10 yılğa qadar apiske qapatıla bile.

2017 senesi mart 23-te Qırım Yuqarı mahkemesi qırımtatar faali Ahtem Çiygoznıñ apiste bulunma müddetini aprel 8-den iyül 8-ge qadar devam ettirdi.

2016 senesi sentâbr 29-da Rusiye Yuqarı mahkemesi Qırımtatar Milliy Meclisi ekstremistik cemaat teşkilâtı olğanını tanıdı ve onıñ faaliyetini Rusiye Federatsiyasında yasaq etti.

İyün 29-da Birleşken Milletler Teşkilâtınıñ insan aqları boyunca baş kâtibiniñ yardımcısı İvan Şimonoviç Rusiye Yuqarı mahkemesini Meclis faaliyetiniñ yasaqlanması aqqında qararnı lâğu etmege çağırdı. Mayıs 12-de Avropa parlamenti Avropa birligi aza-devletlerine Meclis faaliyetiniñ yasaqlanması içün mesüliyetli olğanlarğa nisbeten sanktsiyalarnı kirsetmege teklif etti.

Aprel 27-de Avropa birligi işbu qararnıñ «qırımtatarlarnıñ aq-uquqına ciddiy ücüm» olğanını ayttı.

Amerika Birleşken Ştatları Qırımtatar Milliy Meclisi faaliyetiniñ yasaqlanması aqqında Rusiye Yuqarı mahkemesiniñ qararınıñ qanuniy olğanını tanımay.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Фото аватара

Автор: Редакция Avdet

Редакция AVDET