«Jamala.UА» vesiqalı filminiñ gala-premyerası bestekâr, djaz improvizatsiyası ustası Üsein Bekirovnıñ çıqışınen başlanacaq.
Bu aqta aprel 4-te merasim teşkilâtçıları bildirdi.
«Filmni Jamalanıñ özü taqdim etecek. Gala-premyeranıñ alıp barıcısı Yuriy Gorbunov olacaq, hoş muzıkalı müitni ise Yo-Gurt gruppası teminleycek. Ve eñ müimi – gala-premyera istidatlı bestekâr, djaz improvizatsiyası ustası Üsein Bekirovnıñ çıqışınen başlanacaq», – dep aytıla beyanatta.
Avdetniñ evel bildirgenine köre, aprel 6-da Kiyevdeki «Butterfly» De Luxe kinoteatrinde «Jamala.UА» vesiqalı filmi taqdim etilecek.
«Jamala.UA», Dovjenko-Merkezi ve Ukraina Devlet kinosınıñ desteginen, milliy oynatımğa aprel 13-te çıqacaq.
Aleksandr Dovjenko milliy merkezi matbuat hızmetiniñ haber etkenine binaen, film mustaqil rejissör Anna Akuleviçniñ tarafından, Jamalanıñ razılığınen, amma onıñ kontroli olmadan, çıqarıldı.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
